Shillong, Ïaiong 28 : Ka Khasi Student’s Union South West Khasi Hills ha ka sngi Palei ka la leit ban pynsngew ha u Myntri ka tnad Pule Puthi ka jylla, Bah Lahkmen Rymbui halor ka jingshah iehbeiñ ki skul sorkar kiba don ha Mawsynram Block bad ruh ha South West Khasi Hills.
Haba kren bad ki lad pathai khubor hadien ka jingkynduh bad u Myntri, u samla Evansroy Nongrem, Education Secretary ka KSU SWKH, u la ong ba na ka liang u Myntri u la kular ba ïa kitei ki skul yn sa maramot hadien ba ka sorkar ka la dep ban mang tyngka lang ban shna ïa kiwei kiwei ki skul ruh.
Katkum ka jingïathuh jong u, ka Seng ka lap ruh ba kitei ki skul sorkar bun kim biang shuh wat ïa ki jingkhang bah bad ki jingkhangïit kumjuh. La ong ba don ruh ki skul ba wat ki tin-sop ruh kim don shuh kaba la buh jingeh haduh katta katta ïa ki khynnah skul lada jia ba slap.
“Ka daw ba la shu ieh kumtei ka long ba imat na ka liang ka sorkar kam ju leit jngoh ïa kitei ki skul khamtam ha ki skul kiba don ha ki thaiñ nongkyndong hynrei la shu ieh kumto tang namar ki don ha nongkyndong,” u la ong.
La ïathuh ruh ba ïa jingdon jong kitei ki skul jot na ka liang ka seng ki la ïoh jingtip lyngba ki nongshong shnong bad ruh lyngba ki rangbah shnong na kitei ki thaiñ hi.
Katkum ka jingïathuh jong u, kitei ki skul jot ki don ha kylleng kylleng kynthup naduh ha ki thaiñ Mawkyrwat, ha ki thaiñ Mawsynram bad ruh kumjuh ha ki thaiñ Balat.
