La donkam ban thaw da ka SOP ban khang lad ïa ki kynhun ban ïalam ïa ki khynnah napoh ka jylla sha kiwei ki jylla

Ka Directorate of Social Welfare ka Sorkar Jylla, hynne ka sngi Ba-ar, kala pdiang sngewbha biang sa ïa ki 24 ngut ki Khynnah kiba la wan ïalam sha la ïing na Chikkaballapur District, Karnataka da ki tnad sorkar bad ki Agency na Karnataka hi. ïa kine ki khynnah la pyntip sha ka sorkar jylla da ki Agency na Karnataka hadien ba la lap ba kim biang satia ka jaka sah, jaka bam, jaka pule bad ter ter. Nalor kata la lap ruh ba kane ka jaka ba la pynsah ïa kine ki khynnah ka dei ka bym pat register bad ka sorkar Karnataka.
Kumta ka DCPO ka Chikkaballapur, Karnataka hadien ba ka la lap ïa kine ki khynnah ba la shu pynsah ha kum kane ka jaka ka bym pat biang ei ei ka la pyntip sha ka sorkar jylla ha u Nailar mynta u snem bad da ka jingïïatrei lang ki bor sorkar jong ki ar jylla lem bad ki Agency na Karnataka la lah ban wallam noh ïa kine ki khynnah sha kane ka jylla Meghalaya hapdeng ka met ka phad kaba koit kaba khiah.
Bunsien kiba pli ki kmie ki kpa kiba ngat ha ka jingphon jongpah jong ki seng ne kynhun shitniam bapher bapher ki dei kiba duk ba kyrduh bad ma ki da ka jingkmen ba ki khun ki ïoh pule shabar ka jylla khlem kano kano ka jingsiew ki phah beit ïa la ki khun ki kti jongki khlem kano kano ka jingpyrkhat bad jingïohi jngai aiu yn jia ynda ki khun ki poi sha ka thie ka jaka.Nga tharai wei ba ki khun ki la mih na la ïing ba ki kmie ki kpa kin leit peit ruh kim ïohlad kiba pli namar ka jinglut ka bun bad la shu ïa shaniah beit lehse tang da ka phone.
Hooid ym lah ban len ki don ki seng ne ki khynhun kiba biang bad haba ki shimti ïa ki khynnah ki da buh ïa ki ha ki jaka pule kiba biang bad don ruh kiba la pass sha ki kyrdan kiba shalor. Hynrei kiba bun hi ki shu shim kabu ïa ka jingduk ki kmie ki kpa bad ïalam ïa ki khun shabar ka jylla ban ïoh hikai ïa ki da ki jinghikai kiba lehse lah ban ong ban pyrshah ïa kiwei kiwei ki khynhun niam.
Kumba la pynpaw da ka Chairperson ka Meghalaya State Commission for Protection of Child Rights (SCPCR) ka Agatha K Sangma ba na ka liang ka SCPCR ka la ai jingthoh sha u Myntri Rangbah ka jylla ban ai jingmut ban thaw noh da ka Standard Operating Procedure (SOP) khnang ba kino kino ki seng kiba ïalam ïa ki khynnah hapoh ka 18 snem shabar ka jylla kin hap ban bud ryntih ïa kita ki SOP . Kane kan ïarap da shisha wat ia ka sorkar jylla ruh ban tip shano la thmu ban ïalam ïa ki khynnah bad kaei ka jingthmu.
Namar kumba long mynta hi ka sorkar kam ju ïoh jingtip satia haba kino kino ki kynhun ne ki seng ki ïalam ïa ki khynnah shabar ka jylla. Dei tad hadien ba ki khynnah ki la mad bad ïakynduh ïa ki jingeh ba sa poi pat sha shkor ka sorkar ban ud ban nam ban ïarap ban leit shaw ïa ki khynnah ne ïa ki khun ki kti kiba la ngat ha ka apot sepngi. Dang ha kine ki khyndiat bnai ka sorkar ka la hap ban leit shaw ïa ki khynnah kiba la shah ïalam na kane ka jylla sha ka jylla Karnataka hi. Ka jingshim khia jong ki bor synshar ha Karnataka ban bud dien ïa ki kynhun kiba wan ïalam ïa ki khynnah ka long ruh hadien ba ki la lap la bun bun sien ba ki khynnah ki shu im sohsat khlem biang ka jaka sah, jaka pule ne khlem da biang ka bam ka dih.
Kaba kongsan tam ka long ba ka sorkar kan shim khia kloi ban thaw noh ïa ka SOP kumba la ai jingmut da ka Chairperson jongka SCPCR khnang ban ym don shuh kino kino ki seng ne kynhun kiba ïoh ban shu ïalam laitlan ïa ki khynnah na kane ka jylla hynrei ba kino kino kiba kwah ban ïalam kin hap ban bud thik pathik ïa ki SOP bad lada lap ba ki pynkheiñ ïa ki kyndon ha ka SOP kin ngat ha ki kti ka aiñ.