La dep aiti ka PWD ïa ki jaka ban shna surok Shillong -Dawki sha ka NHAI bad NHIDCL

Shillong, Jylliew 20 : Ka Sorkar Jylla ka la dep ban aiti ïa ki jaka sha ka National Highways and Infrastructure Development Corporation Limited (NHIDCL) bad ka National Highways Authority of India (NHAI) ba kin sdang pyntrei noh ïa ka Shillong-Dawki Road Project.
ïa kane la pyntip da u Symbud Myntri Rangbah ka jylla ba khmih ïa ka Tnad PWD (Roads) bah Prestone Tynsong uba la ïathuh ruh ba ka ka dei ka kamram jong ka NHIDCL ban buddien bad ka tnat kam Pohïing ka Sorkar Kmie ban ïoh ïa ki jaka ha Contonment (jaka shipai ha Upper Shillong) na ka bynta ban sdang trei noh ïa ka surok 4-Lane na Rilbong sha Upper Shillong.
“Ngam tip hynrei ka dei ka kamram jong ka NHIDCL ban buddien bad ki Shipai ban ïoh ïa ki jaka ba kan sdang noh ïa ka surok 4-Lane na Rilbong sha Upper Shillong namar katkum ka jingïoh jingtip ka Sorkar Pdeng (Delhi) kala mynjur ban ai jaka ban shna surok” ong u bah Prestone haba ïakren bad ki nongthoh khubor.
U bah Prestone u ïathuh ba ïa kane ka Project la aiti sha ka NHIDCL bad ïa ka surok naduh Guwahati, Jorabat, Shillong bad Sonapur la aiti sha ka tnat NHAI bad kine ki tnat kin sa jubab sha ka tnat Ministry of Road Transport ka sorkar pdeng.
U bah Prestone ula ïathuh ba ka sorkar jylla ka la ïatreilang bad ka Ministry of Road Transport ka sorkar pdeng haba ïadei bad ka jingpyntrei ïa kine ki surok bad na ka liang ka sorkar jylla ka la shim khia ruh ban ïakren bad ka NHIDCL bad NHAI ban pynthikna ba ka jingpyntrei ïa kine ki surok kam dei ban wanrah jingthut haka ïaid ka ïeng ki kali bad paidbah.
Haba kylli halor ka jingtwa khyndew ha Sonapur Tunnel, u Symbud Myntri Rangbah ka jylla ula ïathuh ba mynta ka kynti ki stad na nongbah Delhi bad na IIT ki la wan eksamin ïa ka Sonapur Tunnel na ka bynta ban shim rai kumno ban pynbeit ïa kine ki jingshah ktah ha ka twa khyndew jan man ka por ba ther u lapbah.
“Ka don ka jingthmu ban wemh ïa kane ka jingtwa ha ka Sonapur Tunnel bad dei namar kane ka sorkar pdeng kala phah da ki stad na Delhi bad IIT ba kin wad bniah bad ban bishar kumno ban pyllait ïa kane ka Tunnel na ka jingshah ktah haka jingtwa khyndew” ula ong.
Nalor kane u Symbud Myntri Rangbah ula ïathuh ruh baka sorkar kala bthah ïa ki ophisar ka tnat NHIDCL ban long kiba phikir bad ban pynbiang ïa ki lad jingïada bad ba kin treikam baroh 24 kynta hapoh ka thaiñ surok Rngain ka ba dang mad ka jingtwa khyndew dang shen.
“Ka jingtohkit ba khlad 2 ngut ki rangbah ba twa khyndew ha Rngain ka dang ïaid bad na ka liang ki Pulit bad u IO shen kin sa phah ïa ka kaiphod sha ka sorkar ban leh ïa kaba donkam” la ïathuh u bah Prestone.