La dei ban pynpra noh ïa ka District Library Cum Auditorium ha Jowai bad tei da kaba thymmai

Jowai, Jylliew 13: Ha ka jingliet jurip jong u myntri ka tnad Art and Culture jong ka sorkar jylla u bah Sanbor Shullai mynta ka sngi ïa ka District Library Cum Auditorium ha Jowai ula ong ‘la dei ban pynpra (Dismantle) noh ïa ka Auditorium namar kam long shuh kaba shngaiñ ban pyndonkam bad ban tei noh da kaba thymmai kaba biang nadong shadong kumba long ha Tura’.
Ïa kane u bah Sanbor ula pynban haba ïakren bad ki lad pathai khubor ha Jowai da kaba u ong ba ka jingkwah ka JSU bad ki nongïalam shnong ka dei ban maramot ne pynthymmai noh ïa ka Auditorium kaba la don mynta ha ka jingpei um, ka jingorpait ki rishot bad jingjulor ki jingkhang, ki jaka shnong bad kiwei de.
Hynrei u myntri ha ka jingwan jngoh hi dalade ula lap baroh ki bynta ka Auditorium ki lah ban kyllon ne twa noh ha kano kano ka por khamtam lada wan u jumai, kumta ula ai jingmut ba la dei ban tei thymmai noh ïa ka, lyngba Technical Wing na Delhi jong ka party BJP ka ban ïarap ïa kane khlem da donkam ka jingsiew ban pynkhreh ïa ka DPR bad leit rah sha ka sorkar kmie ban ïoh ïa ka sanction pisa.
Ula ai jingmut ruh la donkam ban seng noh ïa ka ‘Monitoring cum Implementation Committee’ kaba kynthup lang ïa ka JSU bad ki nongïalang shnong ba kin peit ïa ki jingdonkam baroh ha kaba ïadei bad ka jingtei ïa ka Auditorium kaba thymmai katkum ka juk ba mynta.
Ha kajuh ka por kane ka Committee ka leit jurip lang ïa ki tiar ki tar bad ki jingdonkam baroh kiba ïadei bad ka jingtei thymmai ïa ka Building naduh rukom pyndonkam ïa ki nor rot, ka dewbilat bad kiwei, khnang ban lait na ka jingbam sap ne ka tuh ka thim ïa ka pisa pilai, ha kaba ula ong ba kane ka Committee kan leit jurip manla ki sngi ha ka por ba tei ïa ka Building.
Na ka liang u bah Sanbor ula kynthoh jur ïa kane ka jingleh tep eit miaw kaba la sdang ka jingmaramot ïa kane ka Auditorium kaba long tang ban pynhun ïa u Myntri, hynrei ula kren shai ban ym kmen satia ïa kane ka jingleh jong ki.
“Kaba donkam ka long ban tei beit da kaba thymmai lyngba ka jingïarap jong ka Ministry of Arts and Culture jong ka sorkar kmie katkum ka Building by law, ba thymmai kala long beit 6 mala kaba lah ban kot palat ïa ka shispah klut tyngka.
Ha kane ka building ba 6 mala kan don ïa ki jaka pynïeng kali (parking), ka stall ban pynïaid ïew ïa ki mar ki mata na ka bynta ki samla, ka Theatre Auditorium kaba pynhun ïa ki paidbah, ka Museum bad ki Lift (elevator) kiba don haduh saw tylli ban pynsuk ïa ka hiar ka kiew.
Ula pyntikna ruh ‘Lada wan da ka sorkar Bharatiya Janata Party (BJP) hapoh ka jylla tang hapoh 5 bnai la lah ban sdang pyntreikam ïa katei ka jingthmu ban tei thymmai, hynrei lada ka BJP kam ïoh ban shna sorkar kumba long ha kiwei pat ki jylla kan shim por da ki 8 ne 9 snem ban ïoh ïa kane ka jingthmu.