La dap 10 bnai duh tulop ki nongtrei ka JHADC, dawa na ka sorkar ban leh ïa kaba donkam

Jowai, Risaw 04: Ki nongtrei ka JHADC hapoh ka lama jong ka Jaiñtia Hills Autonomous District Council Staff Association, (JHADCSA) Jowai mynta ka sngi ki la pynlong da ka jingshong kyllaiñ myngngor ha ryngkat ki placard ha phyllaw jong ka ophis treikam ka JHADC naduh ka por 10 baje mynstep.
Kane ka jingmih ki nongtrei ka JHADC ka long kum ka dak ban pynpaw ïa ka jingsngewsih halor ka jingbym pat ïoh ïa ka tulop jong ki kaba la kynjop 10 bnai mynta naduh u December, 2022 haduh une u September, 2023.
Na ka liang u President ka seng ma Johnson Pohrmen ula pynsngew ba ka Association kala shim ïa kane ka sien jam kaba nyngkong jong ka jingïakhih mynta ka sngi bad kan ban neh haduh ka por jainmiet namar kim kwah ban pynshitom ïa ki paidbah kiba wan donkam sha ka ophis JHADC bad ki long kiba ïeit ïa ka kam.
‘Kane ka jingmih jong ki mynta ka sngi kynthup ïa ki nonghikai skul ka Council ka long shi bynta ban pyni sha ka pyrthei halor ka jingshah eh beiñ jong ki nongtrei kiba la don haka jingthngan la 10 bnai khlem da don kiba peit ïa kane na ka liang ka sorkar”.
Ula ong “Lada ka sorkar kam sngap bad kam don kano kano ka jingkhieh na ka bynta ka jong ki kim banse ban shim da kiwei pat ki sien jam ha kine ki sngi ban wan, da kaba u kyntu ïa ka sorkar jylla ban kan pyllait noh ïa ka bhah (dues) kaba dei bad ka tulop jong ki”.
Shuh shuh ula pynsngew wad na ka liang u symbud myntri rangbah ka jylla ma Sniawbhalang Dhar ula wan hiar dalade hapoh ka JHADC ha u bnai June, 2023 na ka bynta ban ïaphylliew jingmut lang naduh ki MDC bad ki ophisar ka JHADC halor ka jingeh kiba ka Council ka ïakynduh jingeh.
”Kane ka jingshem jingeh ki nongtrei ka Council kala sdang ban mih naduh u snem 2019 bad kaba nang ïaid bteng haduh une u snem 2023 la ong u ma Pohrmen.
Ha ka juh ka por ula pynsngew lada ka sorkar kam sngap kan sa dawa ïa kane ka kynhun ban khot lang wat ïa ki nongmih khmat ka Ri-lum Jaiñtia ban pynlong ïa ki jingïakhih ha kine ki sngi ban wan, Namar wat ïa ka Aerial kaba ki dei hok ba kinn ïoh kum ki nongtrei ka Council haduh mynta kim pat ïoh satia.
Haba ïakren bad kitei ki nongtrei ka Council kila pynsngew ïa shibun ki jingeh jong ki khamtam ban pyndap pynbiang ïa ka ïing ka seng naduh ka bam ka dih, ka kup ka sem, ka jingdonkam ki khun haka pule puthi, ka jingkoit jingkhiah nalor kiwei de ki jingdonkam kiba manla ka sngi. Da kaba ong ruh ba kane ka jingai tulop shisien shipor ïa ki ka long kumba ai dawai Polio kaba pynjaw shi drop ar drop.