Shillong, Ïaiong 11: Ka Sorkar Jylla kala bthah ïa ka Tnad Meghalaya Police ban pynthikna la ka dei kaba don shisha ne em ka jingbyrngem pynbthei bomb jong ka kynhun kiengatiar lyngba ki Social Media.
“Ngi la dep bthah ïa ka Tnad Pulit ban tih bad wad la kane ka jingbyrngem bala pynsaphriang ha ki Social Media ka dei kaba thikna bad kaba dei shisha ne em. Mynta ki Pulit kila pynïaid shakhmat ïa ka jingtohkit” ong u Symbud Myntri Rangbah ka Jylla Bah Prestone Tynsong haba ïakren bad ki nongthoh khubor hynne ka sngi nyngkong.
Ka kynhun kiengatiar bala tip kum ka Lawei Ba Phyrngao kala pynithuh ïalade kum ka kynhun ki 37 ngut ki samla ba khlem kam bad kila byrngem ban buh bad pynbthei bomb ha ki jaka pule ka Nongbah Shillong.
Haba kylli la ka jingpynkha ïa kane ka kynhun ka long ban pynthut noh ïa ka jingtyrwa ïakren iasuk bad ka HNLC, u Symbud Myntri Rangbah ula ong “Ngam tharai satia namar kumba nga ïathuh ha phi ba ngi dang wad ban pynthikna. Ngi la dep khot ïa ka HNLC bad nga da kmen shisha ba mynta kila kwah ban shong ïakren iasuk noh”.
