La antad ba dang don bun ki briew kiba dang sahkut ha krem dewïong ha Mynsngat (Thangsko)EJHD: SP EJHD
Khliehriat Rymphang 5: Katkum u kyrwoh khubor ba la phah da u Superintendent of Police ka East Jaiñtia Hills District, u Vikash Kumar, IPS la ong ba ha kaba ïadei bad ka jingbthei ki bom dynamite hapoh krem dewïong kaba don ha Mynsngat ha ka thaiñ Thangsko kaba hap hapoh Umpleng Police Outpost la ong haduh khatphra ngut ki briew kiba la khlad noh bad kane ka jingjia ha ka por 7 baje mynstep jong ka 5 tarik Rymphang 2026 bad antad ruh ba ki dang bun bha ki briew kiba dang sahkut hapoh kane ka krem dewïong.
La ong ruh ba hadien ba la ïoh jingtip ba don ka jingbthei bom dynamite hapoh krem dewïong ha Mynsngat, mar mar na ka liang ki pulit ki la leit sha katei ka jaka bad ong ruh ba ka jingbthei ki bom dynamite ka jia hapoh krem ba tih dewïong kaba dei ka jingtih dewïong be-aiñ, kumjuh ruh na ka liang ka kynhun pyllait im ne ka Rescue Team ruh mar mar ka la wanpoi sha katei ka jaka khlem da pynslem, ha ka jingwad la lah ban sei noh shabar ïa ki khatphra ngut ki met ïap kiba ïap hapoh krem bad uwei uba mynsaw jur bad mar mar la pynkit noh ïa uba mynsaw sha Sutnga CHC bad mardor hi na Sutnga CHC la pynkit noh sha Shillong ban ïoh ïa ka jingsumar ba kham bha.
Shuh shuh, ka kynhun pyllait im, ka National Disaster Response Force (NDRF), State Disaster Response Force (SDRF) bad ka Special Rescue Team (SRT) ki dang bteng ïa ka kam ha katei ka jaka tih dewïong ha Thangsko ban wad ïa ki briew kiba dang sahkut hapoh krem.
Ha kaba ïadei bad kane ka jingjia ka tnat pulit jong ka East Jaiñtia Hills District ka la register Suo-motu case ha Khliehriat Police Station (case no 14/2026 U/s 105/118(2)/3(5) BNS R/W section 21/21(1) MMDR Act R/W section 3 Explosives Substances Act) bad ka jingtohkit ruh ka dang iaid shakhmat.
Na ka liang ki bor pulit ki kyntu ba lada don mano mano ba don jingtip ïa ki briew kiba dang phet rieh na kti ki pulit kiba don kti ha kane ka kam be-aiñ kin sngewbha ban pyntip mar mar sha Police Station ha kaba ka tnat pulit ka kular ban buhrieh ïa ka kyrteng jong kiba ïarap ban pyntip bad yn ai ruh ïa ki da ka khusnam.
Ki thymmei khubor ki ïathuh ruh ba ki don lai tylli ki krem dewïong kiba don marsyndah bad kawei na kine ki krem, ki nongtrei ki la pynbthei bom khlem da pyrkhatlang ïa kiwei kiwei pat kiba dang trei ha ki ar tylli ki krem.