La ai khusnam ïa ki ophis sorkar bad ki Bank na ka bynta ka jingpyntreikam ïa ka Official Language

Shillong, Lber 09: Ka Joint Regional Official Language Conference bad ka jingïalang sam khusnam na ka bynta ka thaiñ Mihngi bad thaiñ shatei lammihngi, ba la pynïaid da ka Tnad Official Language, Tnad Kam Pohïing, Sorkar India, ka la long ha nongbah Guwahati mynta ka sngi. Ha kane ka jingïalang la ïadonlang u Myntri Rangbah ka jylla Assam, Dr.Himanta Biswa Sarma bad u Myntri Khynnah jong ka sorkar pdeng, Nityanand Rai. Ki nongshah khot sngewbha, ba kynthup ki dkhot jong ka ïing dorbar thaw aiñ Parliament u Dilip Saikia bad ka Bijuli Kalita Medhi. Ka jingïalang ka phaikhmat halor ka jingkyntiew ïa ka ktien Hindi, ka jingkiew ka jingpyndonkam ïa ka ha ki kam jong ka sorkar, bad ka jingpynïasoh bad ka teknoloji ban kyntiew ïa ka.
Ha ka jingai jingkren jong u, u Myntri Khynnah jong ka sorkar pdeng ba dei khmih ïa ka Tnad Kam Pohïing, Nityanand Rai u la ban jur ïa ka jingkongsan ka ktien Hindi kum ka official language bad ka bor ban wanrah ïa ka jingïasoh jong ki ktien ba bun jong ka India. U la kren shaphang ka jingkongsan ka Rajbhasha Sammelan kum ka rynsan ban pynshlur ka jingpyndonkam ïa ka ktien Hindi ha ki tnad sorkar, ki ophis, bad ki bank. U la ban jur ba ïa ki skhim jong ka sorkar bad ki sienjam dei ban pynïasoh bad baroh ki briew jong ka ri, da ka jingpynthikna ba ki ïoh ki juh ki jingmyntoi. U la kren ruh shaphang ka jingkongsan ka jingkyntiew ïa ka jingïadei kaba khlaiñ hapdeng ka sorkar bad ki paidbah lyngba ka jingpyndonkam ïa ki ktien kiba ïahap, kaba pynkhlaiñ ïa ka bynta jong ka Hindi ha kane ka jingpyrshang.
U Myntri u la bteng da kaba ong ba ka ktien kam dei tang ki lad ban ïakren hynrei ka dei ka dak jong ka jinghiar pateng ka deiriti jong ka ri. U la kren shaphang ki sienjam bapher bapher ba la shim da ka sorkar ban kyntiew ïa ka ktien Hindi bad kiwei kiwei ki ktien jong ka ri, ba kynthup ka jingplie paidbah ïa ka ‘Kanthasth’ ka atiar jingpynkylla ktien ha u snem 2018, ka jingban jur halor ki ktien tynrai ha ka New Education Policy 2020, bad ki sienjam ban kynthup ïa ka ktien Hindi, Kashmiri bad Dogri ha ki official language jong ka Jammu and Kashmir. Shuh shuh, u la kren shaphang ka jingwanrah ïa ka ‘All India Rajbhasha Sammelan’ ha u 2022 bad ka jingpynïar ïa ka ‘Rajbhasha Gaurav Purashkar Yojana.’ U la ban jur halor ka jingdonkam ban pynïasoh ïa ka ktien Hindi bad ki ktien jong ka ri bad ka teknoloji, da kaba pynthikna ka jingseisoh bad ka jingïoh bynta lang baroh.
U Myntri Rangbah Dr. Himanta Biswa Sarma, ha ka jingai jingkren jong u, u la ong ba ka ktien Hindi ka dei ka dak jong ka jingïatylli jong ka ri. U la ong ba hapdeng ka jingïar ka ktien jong ka ri, ka Hindi ka long kum ka jingpynïasoh ba kongsan bad ki thaiñ bapher bapher. U la ïaroh ïa ka Tnad Kam Pohïing na ka bynta ki sienjam jong ka ha ka jingkyntiew ïa ka software ba ïadei bad ka jingpynkylla ktien bad ka jingpynïasoh ïa ka ktien Hindi bad ki rynsan teknoloji katkum ka juk mynta, bad kyntu ka jingpdiang shuh shuh ïa ka Hindi ha ka jingsynshar bad ka jingpynïaid kam.
Ha ka jingïalang, la pyllait ïa ka bynta ba kyrpang jong ka magazine jong ka tnad Rajbhasha Bharti, ryngkat bad ka jingplie ïa ka alpha version jong ka Kanthastha (3.0), ka software pynkylla sha ki ktien bapher bapher ba la shna na ka bynta ka Bhartiya Bhasha Anubhag. Ha kane ka jingïalang la don ruh ka jingsam khusnam kaba ai jingithuh ïa ka jingtrei shitom ban pyndonkam ïa ka official language. U Myntri Rangbah Dr.Himanta Biswa Sarma u la ai ïa ki khusnam sha ki ophis sorkar, ki bank, bad ki kompeni na ka bynta ki jingnoh synniang jong ki ban kyntiew ïa ka ktien Hindi. La pynkup burom ïa ki Town Official Language Implementation Committee (TOLIC) da ka TOLIC Rajbhasha Samman. La sam 48 tylli ki khusnam, ba la jied katkum ki Kaiphod Quarterly Progress ba la phah lyngba ka Information Management System.
Kane ka jingïalang ka kynthup ïa ka thaiñ mihngi bad ka thaiñ shatei lammihngi. Ka thaiñ mihngi ka kynthup ïa ka West Bengal, Odisha, Bihar, Jharkhand, bad ka Andaman & Nicobar Islands, katba ka thaiñ shatei lammihngi ka kynthup ïa ka Assam, Tripura, Mizoram, Nagaland, Manipur, Meghalaya, Sikkim, bad Arunachal Pradesh. Dang shen ha une u snem, la pynlong ïa ka regional conference ba nyngkong ha ka 4 tarik Kyllalyngkot, 2025 ha Mysore, Karnataka, bud sa ka jingïalang kaba ar ha ka 17 tarik Rymphang 2025 ha Jaipur. Ka jingthmu ba kongsan jong kine ki jingïalang ka long ban pynthikna ka jingpyntreikam ïa ka Official Language Policy ha ki ophis sorkar pdeng, ki Bank, ki PSU, ki Autonomous Body, bad ki Town Official Language Implementation Committee ha kine ki thaiñ.