La 6 snem long MDC u Bah Charles khlem ki kam pynroi ha Mawhati, kynthoh u Bah James Sylliang

Nongpoh, Rymphang 17: Sa tang da ki sngi ban poi noh sha kata ka jingjied ïa ki nongmihkhmat(MDC) sha ka ïing Dorbar thaw aiñ ka KHADC, ka ban sa long ha ka 21 tarik u Rymphang 2025, u kyrtong ka UDP na Mawhati Constituency, u Bah James Sylliang ryngkat ka party UDP mynta ka sngi, ki la pynlong ïa ka jingïalap election ha ïew Mawhati na ka bynta ban pan ïa kata ka jingkyrshan na ki paidbah ban pynjop biang ïa u kum u MDC kumba u la long teng u MDC barim ka Mawhati.
Da ki spah ngut ki paidbah ki la ïalum ha kane ka sngi ïew Mawhati ban sngap ïa ki nongrim ïalap election u Bah James Sylliang kum u kyrtong ka UDP ryngkat ka jingdon lang u Bah Robert June Kharjahrin, uwei na u nongïalam ka state UDP, uba la kren halor shibun ki nongrim ban pan kata ka jingkyrshan na ka bynta ban pynjop ïa u Bah James Sylliang kum u kyrtong ka UDP na Mawhati Constituency ha kane ka election MDC 2025 sha KHADC.
Haba kren ha kane ka sngi, u Bah James Sylliang, u la kynnoh ba la 6 snem mynta ba u Bah Charles Marngar u la long kum u MDC kim don satia kino kino ki kam pynroi na ka KHADC bad u la pynpaw ruh ba ki paidbah ki sakhi ïa kata, da kaba kam ba ha ka por ba u long kum u MDC ki don shibun ki kam pynroi kiba u la wan rah hapoh ka Mawhati Constituency lyngba ka skhim MDC.
U Bah James Sylliang u la ther tyngeh ruh ïa u Bah Charles Marngar kum u MLA bad MDC, halor ka jingleit pynïasoh sha ka party NPP, ba ki paidbah ki la pynjop naduh ka kyrdan MDC bad MLA na ka party Congress, hynrei khlem da burom ïa ki paidbah kiba la pynjop ïa u bad kane hi ka paw shai ba u khlem khein snep satia ïa ka jingpynkupbor ki paidbah kiba la ai bor ïa u ban long kum u MDC bad MLA ka Mawhati, u la ong.
U la ong ruh ka jingjop u Bah Charles Marngar kum u MDC bad MLA ka dei ba ki paidbah kim kwah satia ban ailad ne pynjop ïa ka party NPP, ha kaba ki la pynjop ïa u na ka party Congress bad kaba sngewsih ka long ba u la iuhroit kylla ïa ka bor u paidbah kiba la pynjop ïa u kum u MDC bad MLA na katei ka Constituency.
U la pynpaw ruh kumba u Bah Charles Marngar u la pan jingkyrshan na ki paidbah ban ai da uta u tyrnem baheh ba un ioh ban tied ha Assembly, kata ban pynjop ha ka Election MLA ba la dep bad kaba sngewlyngngoh pat ba utei u tyrnem heh ba la ai ki paidbah u tied kylla ïa ki paidbah bad ïa lade pat u leit ban pynïasoh sha ka party NPP khlem da burom ïa ka sur u paidbah.
Namarkata, na ka liang une u kyrtong ka UDP na Mawhati, u Bah James Sylliang u la pan ka jingkyrshan kaba radbah ban pynjop ïa u kum u MDC na Mawhati ha kane ka kynti bad kum ki paidbah kim dei ruh ban shu sngap ïa ka jingpynbiej kiwei ki party bad lada ki paidbah ki kloi ban pynjop ïa un dang ïai bteng ban lur ïa katei ka Constituency na ka kyrdan MDC kaba u donkam ba ki paidbah kin pynjop shuwa ïa u kum u MDC jongki, u la bynrap.