La 50 snem mynta khlem pat pyntreikam ïa ka roster system ha ka thungkam thungjam : Conrad

Shillong, Ïaiong 13 : U Myntri Rangbah ka Jylla, Conrad K Sangma ha ka sngi Balang u la ong ba ka jylla la 50 snem mynta kam pat pyntreikam satia ïa ka roster system ha ka thungkam thungjam.
Haba kren bad ki lad pathai khubor hadien ba la wai ka jingïalang jong ka kynhun Myntri, u Myntri Rangbah u la ong, “Ha kine ki 50snem ba la dep naduh ba don ka bhah thungkam thungjam, kane kam shym la don satia.”
Shuh shuh u ong ruh ba hadien ba ka Court ka la bthah halor kane ka kam, kumta na ka liang ka sorkar ki la bishar bniah bad ïatai sani ha shwa ba kin phah pat ïa ka jubab sha ka High Court.
Nalorkata, u ong ruh ba dei kane ka sorkar ba mynta kaba la wanrah ïa kane ka roster system na ka bynta kito kiba don jingthut ha ka dkhot met (People With Disabilities).
U Myntri Rangbah u la ïathuh ba ki la ïatai ruh ha ka kynhun Myntri halor ka hukum jong ka Meghalaya High Court kaba la pynsangeh ïa baroh ka thungkam thungjam jong ka sorkar tad haduh ban da don ka roster system.
Halor kane, u Myntri Rangbah u la ong ba ka sorkar ka la pynkhreh mynta na ka bynta ban jubab sha ka Court.
“Ngin sa ïakren biang ïa kane ka phang ha kine ki khyndiat sngi ban wan bad ban lum shuh shuh ïa ki jingtip,” u la ong da kaba pyntip ba ki khlem pat lah ban pyndep ïa katei ka kam ha katei ka sngi.