La 25 snem tam shah ieh khunswet ka surok Mawthawpdah-Laitlawsnai-Rangdkhew-Mawsynrap

Mawkyrwat, Lber 16: Ka long kaei kaei kaba i sangsot haba peit ïa ka leit ka wan lyngba ki surok namar ki paidbah jong ka thaiñ Shilliang Um ki la hap ban mad ïa shibun ki jingeh namar naduh u snem 2006 ba la ïoh ban siang rong ïa kaba dei ïaid na surok Mawthawpdah-Laitlawsnai-Rangdkhew kaba la don ruh ka jingthmu ban pynïasoh haduh Marngor mynta la shu ieh khlem don mano mano ba ïa peit lem.
Lah ba kdew ba ka jingsiang rong nyngkong ïa ka surok Mawthawpdah-Laitlawsnai-Rangdkhew ka dei lyngba ka jingïarap jong ka kong Irin Lyngdoh mynba ka dang long ka MLA jong ka Pariong Constituency ha ki snem 2006 bad ha kaba ïadei bad ka surok Mawthawpdah – Marngor la sdang tih thymmai naduh ki snem 1993-’94 lyngba ka skhim MLA ha ka por ba u Bah Rowell Lyngdoh (bam kwai ha dwai U Blei) u la long u MLA jong ka Mawkyrwat Constituency.
Ym tang kata, na kane ka surok la don ruh ka jingthmu ban pynïasoh ïa ka Mawthawpdah ban pynpoi haduh Marngor bad lada don lei lei ka surok ba bha ki khyndai (9) tylli ki shnong ki ïoh ban pyndonkam ha ka ïaid ka ïeng kata shnong ki long ka shnong Laitlawsnai, Rangdkhew, Mawsynrap, Mawjyrsim, Mawsep, Pynden Mawramhah, Mawthong, Mawlarkon bad ka Sohmasem.
Halor kane ka jingshah iehshrah, na ka liang jong ki nongïalam shnong jong ka Laitlawsnai, Rangdkhew bad Mawsynrap ki la pynpaw ba kane ka jingleh jong ka sorkar bad ruh ka jingbympeit lem jong ki nongmihkhmat ka la long ka jingduhnong kaba khraw na ka bynta ki paidbah nongshong shnong khamtam eh ha kaba ïa dei bad ka pang ka shitom (shitom jur). Hooid! ka la don ka Sub Center hynrei lada don kiba kham jur lei lei kan shem jingeh ban ïaid ïa ka lynti kaba khoh ruh khoh ram. “Ha ka kit ka bah, ha kaba ïa dei bad ki mar ki mata lei lei lada ka surok ka sniew ka long eh shibun namar ym lah ban pynpoi ne pynkit ha ka rukom kaba dei”, ong ki paidbah.
Namarkata, ko ki nongmihkhmat wat ju pyrta tang da ka ktien ne ha ki jingthoh ba “ka surok ka dei u budlum ka ïoh ka kot jong ki paidbah”, hynrei dei ruh ban da leh da ki kam khnang ba ki paidbah kin suk ha ka leit ka wan ne ha ka pang ka shitom khamtam lada dei ha ki por lyuir namar ki surok ba dei ïaid na Mawthawpdah-Rangdkhew-Mawsynrap ki don ki jaka ba dei tang ki surok khyndew suda.
Hooid! ym lah ban len ba na ka liang ka tnad PWD (Roads) ka la dep ban pynbha ïa ki jaka ba long sniew palat hynrei mynta pat kane ka jingpynbha ne repair ka la sdang sniew biang bad ka la shem jingeh ïa ki kali ban ïaid ban ïeng ha ka rukom kaba dei. Namarkata, sa shisien ki buh biang ka jingkyrpad ïa ka tnad PWD (Roads) bad kumjuh ruh ïa ki nongmihkhmat ba ki dei ban leh ei ei halor kane ka bynta khnang ba ka ïaid ka ïeng jong ki paidbah lyngba ki kali kan long kaba suk kumba long lem ha kiwei de ki jaka.