Nongstoiñ, Risaw 20: Uwei u rangbah briew ba la 43 snem ka karta ba la tip kyrteng kum u Phyrnailin Nongrem na ka shnong Mawkhlam-Nongpyndeng, u la jah na la ïing naduh ka 13 tarik u Risaw 2025 bad haduh mynta u khlem wanphai ïing shuh.
Katkum ka ejahar ba la ujor ha Nongstoiñ Police Station, la ong ba utei u rangbah u la jah na la ïing naduh ka janmiet jong katei ka sngi bad haduh mynta u khlem wanphai shuh sha ïing bad ym shym la don ba ïohi shano bad badno u leit.
Kiba haïing ki la pyrshang ban leit wad kylleng ki jaka kiba u ju kham leit bad ki la kylli ruh na ki lok ki jor kiba u kham ïajan, hynrei ym shym la don satia ba ïohi ne lap sabud ïa u, bad kane ka la pynshaiong ngain¨ ïa ka ïing ka sem hi baroh kawei.
Kumta, kiba ha ïing ki la pyntip noh ïa katei ka kam sha ki bor pulit bad ki bor shnong bad kiba ha ïing mynta ki dang bteng ban leit wad sa sha ki khlaw ki btap bad ki lum ki wah kiba u ju kham sngew tynnad ban leit.
Na ka liang ki pulit ruh ki la ïathuh ba kin sa shim ïa la ka jong ka bynta ban wad jingtip halor ka jingjah jong utei u rangbah. La kyntu ruh ïa kino kino kiba ïohi ne lap, ba kin sngewbha ban pyntip sha police Control Room ha u number 9366498499 lane phone sha kiba ha ïing hasem ha u number 9774296991, 7005938801.
