Nongstoiñ, Nailar 13 : Ka Myntri ba peit ïa ka tnad ka koit ka khiah ha ka jylla, Dr. M Ampareen Lyngdoh kan wan ban plie ïa ka Sub Health Centre ha ka shnong Sohparu kaba don ha rud ka surok Nongstoiñ sha Nongkhnum hajan jong ka shnong Lawse.
U bah G.R.Marweiñ secretary jong katei ka shnong haba pyntip ha u nongthohkhubor jong u Mawphor mynta ka sngi u la ong ba ki paidbah nongshong shnong katei ka thaiñ ki la angnud la slem bha ban ïoh ïa ka jaka sumar bad ha kine ki snem ba la dep ba ka sorkar ka la sngap bad ka la pynïoh ïa ka skhim na ka bynta ban shna ïa katei ka jaka sumar hadien ba la pyndep na dong sha dong.
U ong ba katei ka jaka sumnar kaba la pynbit pynbiang yn sa ïoh ban plie paitbah da ka Myntri ka koit ka khiah ha katei ka sngi ha ka por shiphew baje mynstep. Nalor kata ha katei ka juh ka sngi ka Myntri kan leit ban plie ruh ïa ka free medical camp kaba la pynlong da ka ophis jong ka District Medical & Health Officer West Khasi Hills ha ryngkat ka jingïatreilang bad ka ophis u Deputy Commssioner, ka ophis jong ka District Programe Officer (ICDS) West Khasi hills ka ban pynlong ha Ri Khasi Free morning Upper Primary School Tiehsaw.
Katkum ka jingpynbna paidbah la ong ba ha katei ka free medical camp kan don ruh ka jingshondur ïa kito ki nongshong shnong ki bym pat don ïa ka Meghalaya Health Insurance Scheme (MHIS Card), ka jingai snam ei da kino kino ki nongshong shnong kiba kwah ban ïarap ïa kito kiba shitom ha ki Hospital kiba don kam snam kyrkieh. La pyntip ruh ba nalor ka jingai jingsumar ei ïa kiba shitom kan don ruh ka jingpynshai sha ki paidbah kumno ban bam ïa ki jingbam kiba tei met khnang ba kin ïoh ïa ka jingkoit jingkhiah ba paka.
