Kyrshan tylli ka Dorbar Shnong Brichyrnot ïa ka jingpynsngew paidbah ka Star Cement ban tih mawshun

Shillong, Risaw 02: Ka Dorbar shnong jong ka shnong Brichyrnot East Jaiñtia Hills ka la pynbna ba kan ai ka jingkyrshan ba pura ïa ka jingpynsngew paidbah (Public Hearing) kaba la pynbeit da ki bor sorkar na ka bynta ban ïoh tih mawshun ka Star Cement ka ban long ha ka 8 tarik Risaw.
ïa kane la pyntip da u Rangbah Shnong ka Brichyrnot, u Bah Stanly Massar hadien ba ki don ki briew kiba kam ba ki dei ki nongïalam kata kynhun ‘ Elaka Narpuh Youths for Change’ kaba la wer ïaki paidbah ban pyrshah jur ïa kane ka jingpynsngew paidbah lane ka Public Hearing ka ban long haka 8 tarik mynta u bnai.
Ka jaka ba la thmu ban tih mawshun da ka Star Cement ka long kaba heh kumba 65 Hectare bad katei ka jaka ka hap hapoh ka shnong Brichyrnot kaba jngai tang kumba 500 meter na ka shnong
Ka jaka ba la thmu ban tih mawshun ka jngai kumba 2 km na ka Eco Sensitive Zone jong ka Narpuh Sanctuary bad ka Star Cement ka kam ba ka bud ïa baroh ki jingbthah jong ka Sorkar Jylla khamtam ïa ki kyndon ka tnat Mining.
Kat kum ki kyndon, kumba 2 kms eiei na ka Eco-sensitive zone, ym shah ban leh ïa kino kino ki kam bad katkum ka kompeni cement, ki bud ryntih ïa baroh ki kyndon bad ki jingbthah.
Haba ïakren bad ki lad pathai khubor, u Bah Stanly Massar u la pyntip ba ki don haduh 60 tylli ki longïing ha ka shnong Brichyrnot bad na ka por sha ka por ka Dorbar Shnong ka ju khot jingïalang ha kaba ïadei bad ki jaka ba thmu ban tih mawshun bad da ka rai kaba ïatylli, ki paidbah nongshong shnong ki la shim ïa ka rai ban ai ka jingkyrshan ïa ka Public Hearing.
U Rangbah Shnong u la kam ba ka wah Lunar kaba jan tam ruh kam shym la shah ktah namar ki kam jong ka karkhana Star Cement.
“Ngim tip , ngim ju ïoh sngew ïa kane ka kynhun ‘Elaka Narpuh Youths for Change’ bad ngim tip kiei ki jingthmu jong ki hynrei kum ki nongmihkhmat jong ka Dorbar Shnong ka shnong Brichyrnot, ngi ai ka jingkyrshan ïaka Public Hearing” u la ong namar kum ka shnong ngi la ioh bun ki jingmyntoi na kane ka kompani naduh ka jingkiew ka pule puthi ki paidbah, ka jingioh kam ioh jam, ka jingnang kiew ka shnong ka thaw ha kiba bun ki liang. Ka Star Cement ka la iarap ia ka shnong ha kiba bun ki liang bad namar ba ngi ioh bun ki jingmyntoi da kawei ka rai ba iatylli lang ngi la rai ban ai ka jingkyrshan 100 na ka 100 ia ka public hearing kane ka kompani”.
Halor katei ka seng ENYC na ka liang ka Dorbar Shnong ka kwah ba kin pynpaw kyrteng ia lade mano uta u President bad Secretary bad lada ki nud ki dei ban wan mih hakhmat ka Dorbar Shnong ban iakren sngewthuh da kaba shai kdar ong u Rangbah Shnong.