Shillong, Naiwieng, 11: Ki samla pule jong na ki kolej bapher bapher ka rilum Khasi bad Jaiñtia bad kynthup ruh ki kynhun bapher bapher ki la leit ban ai mynsiem bad ban ai jingkyrshan ïa ki samla pule ka skulbah NEHU kiba pynlong ïa ka jingshah thngan kaba khlem pud sngi naduh ka 5 tarik mynta u bnai.
Ha ka Lah Sngi u Blei, ki nongïalam jong ka Naga Students Union (NSU), Shillong ba la lamkhmat da u President u Mughaka Awomi ki la leit jngoh ïa ki samla pule bad ïakynduh ïa ki nongïalam jong ka NEHUSU bad ka KSU NEHU Unit ban ai mynsiem ïa ka jingïakhih jong ki.
U Mughaka Awomi haba kren sha ki lad pathai khubor u la ong, ba ka jingwan ai jingkyrshan ïa ki samla pule ka long namarba ki ïakhih halor ki mat jingdawa kiba shongnia bad bashong shongrim bad u la pynpaw ruh ba ki dkhot ka NEHUSU bad KSU kim dei ban sngew marwei namarba ki ruh ki don lang ha syndah.
Ka kynhun ki samla pule ka Kiang Nangbah Government College la lamkhmat da ka President ka samla Naphisabet Latam bad ki samla pule ka Synod College, Shillong ba la lamkhmat da u President u samla Melvin Taylor Marbañiang ki la pynlong da ka jingïaid rally kum shibynta ban ai jingkyrshan ïa ki samla pule jong ka skulbah NEHU.
Ha ka por janmiet, ki nongïalam ka Seng Samla Mawlai Pyllun ba la lamkhmat da u President u Bah Samuel Biam ki la leit jngoh ïa ki samla pule ka skulbah NEHU ha kaba ki la pynpaw ka jingsngewkhia halor ki kynrum kynram bad ïa ki jinglong jingman hapoh kane ka skulbah kaba don hapoh ka jylli jong ka shnong Mawlai.
U Bah Samuel Biam ha ka jingïakren bad ki lad pathai khubor u la kynnoh ba u Vice Chancellor Prof. PS Shukla u la pynhiar dor ïa ka skulbah NEHU.
“Kat kane ka jingïakhih jong ki samla pule u Vice Chancellor u la dei ban hiar shuki bad u dei ban pyrkhat jngai ruh ba ka jingduh jingmyntoi ïa ki samla pule,” u la ong bad bynrap, “une u VC ha ka jaka ban kyntiew ïa ka skulbah u la pynhiar dor pynban.”
“Une u briew um pyrkhat satia ïa ka jingmyntoi jong ka University hynrei u pyrkhat tang na ka bynta ka jingmyntoi ïalade,” u la bynrap.
“U VC u dei ban sngewthuh shai haba ki samla pule ki dang ïakhih da ka lynti kaba jaijai bad lada ki samla ki thom da ka bor (kaei kaba ban jia). Lada ha ka ri Bangladesh ki lah ban pynkylla ïa ka jingsynshar donbor bad kan eh aïu ïa ki samla pule ka NEHU ban leh kumta lada une u dang ïai pyneh,” la ong.
U Prof. Shukla u dei ban hiar shuki mardor, kata ka dei ka jingkyntu jong ka Seng Samla Mawlai Pyllun.
Ha ka sngi u Blei, ki longkmie na them Ribhoi ki la leit ban ai mynsiem ïa ki samla kiba shong shah thngan hakhmat ka Administration Block ka skulbah NEHU.
