Shillong, Lber 24:Ka National Peoples Party (NPP) kala ai ka jingkyrshan ba pura ïa ka Sorkar BJP ba ïalam da u Biren Singh ha Jylla Manipur.
Haba ïakren bad ki nongthoh khubor, u National President ka NPP bad Myntri Rangbah ka Jylla Conrad Kongkal Sangma ula ong, haba pynshong nongrim na ka jingïakren bad u Myntri Rangbah ka Manipur (Biren Singh) bad ki Nongïalam na Delhi, ki MLA ka NPP kila rai ban kyrshan ïa ka Sorkar u Biren Singh.
Kane kala mih hadien ka jingiamynjur lang ba ka NPP ka dei ka party kaba kyrshan ïa ka Sorkar NDA ha Delhi bad ruh ka dkhot jong ka NEDA.
Haba kylli, u Conrad ula ong “Ka shong ha ka rai jong u Myntri Rangbah halor ka jingai bhah ïa ka NPP ha ka Sorkar bad kane ka dei kaei kaei kaba ngim lah ban ong eiei. Ka jingkyrshan jong ngi ka long beit halor ka jingiatrei lang bad ka NDA bad ha ka NEDA”.
Haba pynpaw ba kam don satia kano kano ka jingïapher jingmut hapdeng ka NPP bad ka BJP, une u Nongïalam ka NPP ula ong “Haba ngi ïakhun ïa ka elekshon, ngi ïakhun halor ki jong ki npngrim bad haba poi sha ka jingïathaw sorkar pat kala dei da kawei pat ka bynta. Namar kata, ki MLA kila iashong jingïalang, iasyllok bad shim ïa ka rai hadien bala ïakynduh ruh ïa ki Nongïalam ka Party”.
“Hadien kane, ha ka sngi babud hi ngi la phah ïa ka shithi ba ai jingkyrshan” ula ong.
