Jowai, Rymphang 25: Ka All Garo Cook Cum Helpers Association hapoh ka jingïalam jong ka Jakme Sangma kum ka President bad u Maltin Momin kum u General Secretary kila wan shakhmat ban ïa snohkti bad ban kyrshan ïa ka Union of Cook Cum Helper PM Poshan Meghalaya Shillong bad ban kyrshan ïaki jingdawa ne kyrpad jong ka sha ka Sorkar pdeng ïa ki jingeh jong ki Nongshet ja sngi ha ki skul kiba don ha Jylla Meghalaya bad ka thaiñ shatei lam mihngi jong ka Ri India.
Ha ka jingïalang kaba la long ha ka 23 u bnai rymphang jong une u snem 2024 kaba la long ha ka Sorbah William Nagar kaba dei ka Head Quarters jong ka East Garo Hills Districts, ha kane ka jingïalang la pynïaid da u Paul D Sangma.
La ïa donlang ki Cook kiba Marjan bad ka William Nagar ha kane ka jingïalang ki Cook ki ïa don kumba 600 ngut eiei bad napdeng kine kumba 360 ngut tam ki dei ki nongkitkam bad ki nongïalam jong ki tnat treikam baroh ki District jong ka Ri-Lum Garo kila wan ïashim bynta da ka jingshitrhem.
Ha ka jingïadonlang ki nongkitkam jong ka UCCH PM Poshan Meghalaya Shillong kila wan naduh u Adviser ma K. L. Pariat bad ka President kong Banalis Syiem, Assistant Secretary bah Charles Shongwan bad kiwei de ki nongkitkam ba ha khmat jong ka central body.
La ïoh ka jingkren na i President kong Banalis Syiem kum ban pynsngew ïa ki Cook baroh kiba don ha ki thaiñ Garo ba kin ïa tylli lang kawei kum ki nongshong shnong jong ka Jylla Meghalaya hi ban wan sha khmat ban kyrpad ïa ka sorkar ban pynurlong ïa ki jingangnud jong ki Cook baroh shi katta.
La ai ruh ka jingkren na u Adiver uba la pynsngewthuh halor ki mat ba ka UCCH PM Poshan kala wan sha khmat ban kyrpad na ka sorkar ïa ka ban pynkiew ïa ka Honorarium, ka Meternity leave, ban ïoh ïa ka bainong na ka bynta 12 ha ka shi snem, ba don ïa ki tyngdong LPG ha manla ki karma shetja PM Poshan bad ula pynsngew ïa ki kam kiba ka Union kala trei baroh shi katta.
