Kyrshan ka Sorkar Meghalaya bad APEDA ban pynlong ïa ka International Buyer Seller Meet ha Shillong
Shillong, ïaïong, 02: Khnang ban pynlong ïa ka rynsan hapdeng ki nongdiebad nongthied kiba na Ri bad na shabar ruh kumjuh, ka Sorkar Meghalaya ka la treilang bad ka Agriculture & Processed Food Products Expert Development Authority (APEDA) ban pynlong ïa ka ‘International Buyer Seller Meet’ ha ka 29 tarik u Lber ha State Convention Centre, Shillong.
La sdang ïa kane ka jingïalang da kaba plie pyrda bad ka leh burom ïa ki nongkren ba pawkhmat bad hadien katta la don ka jingpynithuh ïa ki nongthied bad ki nongshalan mar shabar ri, kiba na kylleng sawdong ka pyrthei .
Kiba la ïa don lang ha kane ka sngi ki long u Dr. Vijay Kumar D, IAS Commissioner and Secretary, Agriculture & Farmers’ Welfare, na ka Sorkar Meghalaya; u U.K. Vats, General Manager, APEDA bad ka Vinita Sudhanshu, Deputy General Manager, Regional Head (NER), APEDA lem bad kiwei kiwei ki heh na ka Sorkar Meghalaya bad ka APEDA.
U Dr. Vijay Kumar D, u la ong ba ka “International Buyer Seller Meet ka long ka rynsan ba kongsan ha ka jingïakynduh ki nongdie bad nongthied ym tang na ka jylla hynrei ruh na kylleng ka pyrthei. Kane ka jingïakynduh ka long ka rynsan bakongsan ha kaba bun ki nongthied ki lah ban rah ïa ka kamai kajih jong ki sha kawei pat ka kyrdan. Haba jam shakhmat, yn sa nang pynlong ïa kum kine ki jingïakynduh da ka sorkar jylla bad ka APEDA.”
La pynkut ïa kane ka jingïakynduh da ka jingkren ai khublei na ka Vinita Sudhanshu, Deputy General Manager, Regional Head (NER), APEDA. Kane ka jingïakynduh, ka la ïarap ban pynïasnohkti lang ki nongdie, nongthied, ki nongrep bad ki nongsengkam lajong na ka jylla. La pynlong ruh ïa ka jingpyni ïa ki tiar ki tar kiba na jylla, ha kaba ki nongdie ki la ïa ïoh kren bad ki nongthied kiba na bar.
Ki nongmihkhmat bapawnam na ka Chamber of Commerce & Industries, Sri Lanka bad ka Lulu Group International, ka Reliance Retail Ltd., ki dei ki kynrem ki lyndan ki ba la ïa don lang ha kane ka sngi. La pynkut ïa kane ka sngi da ka jingïaphylliew jingmut ha kaba la shim ïa ki jingsngew bad jingshemphang jong ki nongshimbynta khnang ban lah ban kyntiew shuh shuh ïa ka jingkhaii jong ka rep ka riang hapoh ka jylla.
La pynlong ïa ka International Buyer Seller Meets (IBSM) ryngkat bad ka jingïatreilang jong ki Indian Missions kiba ha kiwei pat ki ri; ryngkat bad ka jingïashim bynta shitrhem jong ki kynhun ba kyrshan ïa ki kam khaii, bad kiwei kiwei.