Shillong, Nailur 15: Ka khubor ba la ïoh la ïathuh ba ka sengbhalang kaba heh tam ha ka thaiñ Lawngtlai jong ka Jylla Mizoram, ka la pynpaw ïa ka jingkyrshan ïa ka jingker sainar ïa u pud u sam jong ka Indo-Myanmar ha Jylla Mizoram.
Ki nongïalam ka YLA ki la ai ka jingkyrshan ïa ka jingdonkam ban ker mardor ïa u pud u sam namar ka jingbym don ka jingshong shngaiñ hapoh ka Ri Myanmar.
Ka YLA ka kdew ba lada ker sainar ïa u pud hapdeng ka Mizoram bad ka Ri Myanmar, kan tehlakam ïa ki kam khaïi tuh bad kan pynduna ruh ïa ki kam sniew hapoh ka Jylla. Ka la pynpaw ruh ba ka jingker sainar kan ym pynthut ïa kano kano ka jingleit jingwan da ka aiñ namar kin don ki khyrdop talasi.
Ka jingker sainar kan ym ktah ïa ki mrad kiba leit sha kiwei pat ki jaka namar ki don ki jaka ba la tyrwa na ka bynta ka jingleit jingwan jong ki.
Ka YLA ka ai jingkyrshan ïa ka jingtyrwa jong ka Sorkar Pdeng ha ka jingïakynduh ïa u Joint Secretary ka MEA u B Shyam uba dang don mynta ha ka jingleit jngoh ïa ka Nongbah Aizawl.
