Kyrshan ka MFA ïa ka Mizoram FA, ban weng noh ïa ki player kiba suba donkti leh thok ha ki jingïalehkai

Shillong, Naiwieng 06: Da kaba shimkhia ïa ka jingleh jong ka Mizoram Football Association ban khang ïa ki 25 ngut ki nongïalehkai na ki kam ba ïadei bad ka phutbol ha katei ka jylla, ka Meghalaya Football Association ha ka sngi Balang ka la shim ïa ka rai ba kan ïeng ha ka liang jong kane ka para seng bad ban khanglad ïa kine kijuh ki player na ka jingïalehkai phutbol ha Meghalaya.
Ka Mizoram FA ka la pynlong ïa ka jingtohkit ryngkat ka jingkyrshan bad ka jingïatreilang bad ki bor pynjari aiñ, kaba la ïalam bad shem ba ka don ka jingbamsap da kaba leh thok ha ki jingïalehkai. Kane ka la pynlong ïa kate ka Association ban khang ïa 25 ngut ki player, lai ngut ki nongpynïaid (official) bad lai tylli ki klob naki kam kiba ïadei bad ka phutbol na ka bynta ki por bapher bapher naduh shisnem haduh ka jingim, kane ka khubor kaba la pynmih hynnin ka sngi.
Ka Meghalaya FA, kaba pyrkhat haduh katno ka match fixing ka long kaba sniew ïa ka jingïalehkai, ha ka jingïalang kaba la long ha ka sngi Balang ka la rai ban burom ïa ka rai jong ka Mizoram FA bad pynthikna ba baroh kine ki player kiba la shah khang kin nym ïohlad ban shimbynta ha ki league jong ki district association kiba ïasoh bad ka Meghalaya FA.
La ïathuh ha ki lad pathai khubor, ba katto katne ngut na kine ki nongïalehkai, kiba la shah khang, ki dei kiba don jingïadei ne kiba la don lypa bad ki klob ha Meghalaya ha ki por ba la dep.
Ka Meghalaya FA ka thmu ban phah ïa ka khubor kaba tyngeh sha ki player ba kim dei satia ban don bynta ha kum kine namar kan buh ïa ka lawei jong ki ha thmier bad ka ban wanrah jingthut ha ka jingïalehkai.
Kumta ban pynlong ïa ka phutbol kaba beit kaba ryntih na ka liang jong ka Meghalaya FA kan shimkhia bad ïaleh katba lah ban khanglad ïa ka match fixing.