Shillong, Risaw, 30: Ka Meghalaya Tribal Teachers’ Association (MeTTA-NEHU) ka la ai jingkyrshan pura ïa ka jingdawa jong ka NEHUSU bad ka NEHUTA ban weng mardor na ka kam ïa u Registrar bad ïa ki arngut ki Deputy Registrars ba dang shu thung dang shen halor ka jingkynnoh ba kim pat long kiba bit ban pynïaid ïa ki kam hapoh ka skulbah NEHU.
“Ka MeTTA ka pynpaw ïa ka jingsngewkhia halor ka jinglong jingman ha skulbah North-Eastern Hill University (NEHU) halor ki mat kiba ïadei bad ka jingbym beit ka rukom treikam jong u Registrar bad ki Deputy Registrar kiba dang shu thung dang shen,” ong u kyrwoh ba la phah sha ki lad pathai khubor ïa kaba la soi da u President bad ka Secretary.
“Ka MeTTA ka la pynpaw ïa ka jingsngewkhia halor ka jingdkoh bad ki jingbym ïahap ha ki rukom treikam jong kine ki ophisar ki bym don jingtip eiei ïa ki kyndon, ki rukom pynïaid kam ophis. Kane ka paw ha kiba bun ki shithi ba ki la pynmih na ka por sha ka por” la ong u kyrwoh.
“Katkum ki tyllong khubor, la ïoh jingtip ba ki la don bun ki nongthepkam kiba biang bad kiba la shemphang kiba la shakri ha ki tnad treikam bapher bapher jong ka Sorkar Jylla kiba la aplai ïa ki kam hynrei la shu kyntait noh mardor ïa ki,” la ong ka MeTTA bad bynrap, “hynrei u riewmadan, kum u Amit Gupta, u bym don jingshemphang ban pynïaid ïa ki kam jong ka University, u la shah thung kum u Deputy Registrar.”
Shuh shuh, la ïoh jingtip ruh ba ha ka jingthungkam Contractual Post dang shen ha ka Integrated Teacher Education Programme (ITEP), NEHU ki la don bun ki briew kiba tbit ki bym shym la shaha khot sha ka interview, katba, ki briew ki bym don jingtip eiei la thungkam, la bynrap ka MeTTA.
“Haba pyrkhat ïa ka jinglong jingman kaba pynkulmar jingmut mynta ha NEHU, ka MeTTA-NEHU ka kyrshan ïa ka jingdawa jong ka NEHUSU ban pynkut noh ïa ka jingshakri jong u Registrar, u Col. (Retd) Omkar Singh bad ïa ka jingdawa jong ka NEHUTA ban wengkam noh mardor ïa ki arngut ki Deputy Registrar ba la thungkam dang shen namar ka jingbym don jingtip ban pynïaid ïa ki kam hapoh ka skulbah,” la ong shuh shuh ka MeTTA.
