Kyrshan ka HYC ïa ka jingleit tur ki kmie jong ki khynnah skul sha Secretariat

Shillong, Ïaiong 01: Ka Hynniewtrep Youths’ Council (HYC) – Education Cell ka pynrem jur ïa ka rai jong ki bor bahalor ban pynsangeh noh ïa ki bus Meghalaya Transport Corporation (MTC) kiba kit ïa ki khynnah skul, ka sienjam kaba la wanrah ïa ka jingeh ba khraw ïa ki khynnah skul bad ki bahaiing jong ki ha kylleng ka nongbah Shillong bad ki jaka ba marjan. Ka HYC Education Cell ka pynpaw ba ka jingshakri jong ki bus ka MTC ka lah slem bha bad kala iarap bha ïa ki spah ngut ki khynnah skul, khamtam kito kiba wan na ki longïing kiba duk ha ka liang ka ioh ka kot kiba shaniah ha ki kali paidbah kiba rem dor bad kiba lah ban shaniah ban poi sha ki skul jong ki. Ka jingsangeh kynsan jong kane ka jingshakri ka la buh ïa ka jingkit kaba khia ïa ki kmie ki kpa kiba la ïakhun dohiap ia ka jingkiew dor jong ka pule puthi bad ka jinglut jingsep.
Ka HYC ka ai ruh ka jingkyrshan bad ka jingïasnohkti lang kaba pura ïa ki kmie ki kpa kiba la mih shakhmat ban pyrshah halor ka jingsangeh ka leit ka wan jong ki bus MTC.Ki jingsngewkhia jong ki ki long kiba dei hok bad ki pynpaw ïa ki jingeh ba shisha kiba ki longiing kiba ki khun jong ki ki shaniah ha kine ki bus na ka bynta ka jingleit jingwan jong ki man ka sngi sha skul.Na ka liang ka HYC Education Cell ka dawa na ka Sorkar Meghalaya bad ki bor ba dei peit ba kin shim khia mardor ban pynïoh biang ïa ka jingshakri jong ki bus MTC na ka bynta ki khynnah skul khlem da pynslem shuh.
Shuh shuh ka seng ka pynpaw biang ba ka bha ka miat bad ka lawei jong ki khynnah skul ka dei ban long beit kum ka mat ba kongsan tam bad ka la khot ïa ka Sorkar ban jubab ïa ki jingeh jong ki kmie ki kpa bad ki khynnah skul da kaba kloi.