Kyrshan ka HNYF ïa u Bah Sadon ban long u ksiang HNLC ban ïa kren ïasuk bad sorkar Meghalaya

Nongpoh, Lber 29: Tang hadien ba ka Seng HNLC ka la jied bad tyrwa ïa u Bah Sadon K. Blah, uba dei u President ka Hynnewtrep National Youth Front (HNYF)ban long kum u ksiang ka HNLC ban wan sha ka miej jong ka jingïakren ïasuk bad ka sorkar Meghalaya bad ruh sorkar India, ka HNYF Sengkmie mynta ka sngi ka la ai ka jingkyrshan kaba pura ïa u President jongki, u Bah Sadon K. Blah ba un shim ïa kane ka bynta ban long kum u ksiang ka HNLC ban wan ïa kren ïasuk bad ka sorkar Meghalaya.
Na ka liang ka seng HNYF Sengkmie ka la pynpaw ruh ka jingsngewkmen ba ka HNLC ka la jied ïa u President ba rangbah ka seng ban long u ksiang ban wan sha kata ka lynti jong ka jingïakren ïasuk bad ka seng ka la pynpaw ruh ba ka kwah ïa ka jingsuk bad ym da ka lynti jong ka jingpyntriem kaba ktah ïa ka shongsuk shongsain ki paidbah hapoh ka jylla.
Haba ïa kren mynta ka sngi bad ki Nongthoh Khubor ha Nongpoh, u Vice President ka HNYF Sengkmie bad uba dei ruh u President ka HNYF, Northern Region, u Bah Marcus Marten, u la ong ba kum ka seng ka angnud ban pynpaw sha ki paidbah ka jylla ba ka kloi ban pdiang ba u President ka seng un long u ksiang ka HNLC na ka bynta ban ïa kren ïasuk bad ka sorkar Meghalaya, namar kum ka seng kaba shakri na ka bynta ka bha ka miat bad ka roi ka par jong ka jylla ka angndu ban ïa poi noh sha ka lynti jong ka jingïakren ïasuk hapdeng ka sorkar Meghalaya, sorkar India bad ka HNLC kiba la kloi ban wan sha ka mie jong ka jingïakren bad ym shuh ban dang lah ïa ki kam pyntriem kiba ktah ïa ka shongsuk shongsain ki paidbah.
“Ka Seng ka sngew-kmen ruh ban tip ba ka seng HNLC ka la kwah ban wan ïa kren sha ka lynti kaba bha bad ban ïasuk hapdeng ka sorkar bad ka seng bad kum ka seng ka da sngewkmen ruh ba la jied ïa u President ban long uta u ksiang ba kane ka long ka lynti ban wan rah ïa ka jingsuk hapoh ka jylla” ong u Bah Marcus Marten, bad bynrap ruh ka seng HNYF ka dei ka seng kaba ieng ban shakri ïa ki paidbah bad dei namar kane ka daw ruh ka ai ka jingkyrshan ïa u President ba un long uta u ksiang ka seng HNLC na ka bynta ban wan rah sha kata ka miej jong ka jingïakren ïasuk hapdeng ka HNLC bad ka sorkar Meghalaya” u la bynrap.
Ha kajuh ka por ruh u la kyrpad ïa ki paidbah ka jylla ba kim dei ban sngewthuh bakla ba ka seng HNYC ka kyrshan ïa u President ka seng ban long u ksiang ka HNLC, namar ka thong bad ka jingangnud hi ka long ban poi sha ka jingïakren ïasuk bad ruh ba ki dkhot bad ki nongïalam ka HNLC sa shisien kin wan phai sha ka imlang ka sahlang bad ban long ruh kita ki nongkyntiew ïa ka bha ka miat bad ka roi ka par jong ka imlang ka sahlang ha kaba kum ka seng hi ka kwah ïa ka jingsuk ha ka jylal bad ym kata ka jingïaumsnam.
Shuh shuh, u la bynrap ruh da kaba ong ba ka seng ka dawa ruh na ka sorkar Meghalaya ba kam dei ban shim sting ïa kane ka jingïakren ïasuk ba ka HNLC ka la kloi ban wan sha ka jingïakren ïasuk, namar kane ka jingangnud ban wan ïa kren ïasuk kam dei shuh ka sien kaba nyngkong bad lada ka sorkar Meghalaya ka dang khein sting halor kane ka jingtyrwa ka seng HNLC kam dei shuh ka jingbakla ka seng HNLC bad dei ka jingbakla ka sorkar jylla kaba ym lah ban pdiang ïa kane ka jingtyrwa ka seng ban iehnoh noh ïa ki kam pyntriem bad ban wan sha ka imlang ka sahlang ban wan rah jingsuk bad ka jingbha ha baroh ki liang, u la bynrap.
Na ka liang ka HNYF, Northern Region, lyngba u Assistant Secretary, u Bah Donroy Kshiar, u la ong ba ka seng HNYF na Ri Bhoi ruh ka ai ka jingkyrshan ïa u President ban long u ksiang ka HNLC ban poi sha ka miej jong ka jingïakren ïasuk bad kum ka seng ruh kan don ryngkat bad u Bah Sadon K. Blah ban long uta u ksiang b akum ka seng ruh ka kyrshan na ka bynta ban wan rah ïa ka shongsuk shonsain bad ka bha ka miat jong ki paidbah hapoh ka jylla Meghalaya.