Shillong, Nohprah 16: U MP ka Shillong Parliamentary Constituency u Dr Ricky AJ Syngkon ula kyrpad ïa u Myntri ka tnat Kam Pohïing ka Ri Amit Shah ba un pyntreikam lang noh ïa ka Inner Line Permit (ILP) ha Meghalaya, da kaba pynpaw ïa ka jingsngewkhia ïa ka rukom long ka jaka kaba buh ha ka jingma, ka jingshah klun jaka bad ka jingïoh rung kyrthep ki mynder sha kane ka jylla.
Lyngba ka shithi ba la phah ha ka sngi Ba-ar, u Dr Syngkon ula ban jur ba ka jingpyntreikam ïa ka ILP kan pynhap lang ïa ka Meghalaya bad kiwei pat ki Jylla ka thaiñ Shatei Lam Mihngi bad ban ïada ïa ka jingmyntoi ki jaitbynriew trai ri trai muluk.
U la ong, “Ka ILP kam beh ïa kino kino ki nongshong shnong ka ri India ba kohnguh ïa ka aiñ, hynrei, ka pynlong kongsan ïa kito kiba wan rung sha Jylla na shabar ba kin pynrung kyrteng ïalade, ban pyntip ïa ka jingthmu, bad ka por ba kin sah.”
“Namar kata, da kaba burom, nga kyrpad ïa ka Ministry of Home Affairs ba kan ai jingmynjur ha ka ban pyntreikam lang noh ïa ka Inner Line Permit ha Meghalaya hapoh ka Bengal Eastern Frontier Regulation, 1873, ka ban long ruh katkum ka resolution ba la mynjur lang da ka Ïingdorbar Thaw Aiñ ka Jylla ha ka 19 tarik Nohprah 2019,” pynpaw u MP ha ka shithi sha u Amit Shah.
Na ka liang u Dr Syngkon ula kyrpad ruh ïa ka Ministry ba kan thung ïa ka Joint Technical Committee ba kan pynkhreh ïa ki kyndon pyntreikam ïa ka ILP nalor ban pyntip ruh ïa ka Parliament bad ka State Assembly halor ka jinglong jingman bad ka jingtyrwa pyntreikam ïa ka ILP khnang ba ki nongshong shnong kin tip ba ïa ka jingsngewkhia jong ki lah shimkhia ban leh eiei katkum ki lynti ba dei ban ïaid.
Shuh shuh na ka liang u MP ula ïai ban jur ba ka ILP kan kyrshan ïa ka roi ka par bad ki kam jngohkai, haba ai nuksa na kiwei ki jylla ba pyntreikam ïa ka ILP ha ka thaiñ Shatei Lam Mihngi.
U Dr. Syngkon u la pynpaw ruh ïa ka jingdonkam na ka bynta ka ILP ban ïada na ka jingkylla ha ka jingkylla jong ka khyndew ka shyiap bad kumjuh ruh ban pynkhlaiñ ïa ki lad jingïada ha u pud u sam.
“Ka Meghalaya ka sam ïa u pud uba jrong bha bad ka Bangladesh bad u pud u sam bad ka jylla Assam, kaba mad ïa ka jingwan rung kyrthep jong ki mynder ri,” pynpaw u Dr. Syngkon.
