Kyrpad u MLA ka Mawlai ïa u Dy. CM ban pynduna ïa ki kynta pynlip bording mynmiet

Shillong, Naitung 6 : U MLA jongka Mawlai Constituency u bah Process T Sawkmie u la kyrpad jur ïa u Symbud Myntri Rangbah ka jylla u bah Prestone Tynsong uba dei peit ïa ka tnad pynmih bording ha ka jylla ban bthah ïa ka tnad MeECL ban pynduna ïa ki kynta pynlip bording ha ka por mynmiet ha kane ka nongbah Shillong namar ba la jur ki kam sniew kam smeh bad buh ka jingngiew jingsheptieng ïa ki paid nongshong shnong baroh.
Haba ïakren bad u nongthoh khubor u la ong “ U Symbud Myntri Rangbah u dei ban bthah noh ïa ki bor pynïaid ka MeECL ba kin pynkylla noh ïa ki kynta pynlip bor ding da kaba pynduna noh mynmiet bad kham pynbud mynsngi kata ruh ym dei ban pynlip da ki kynta lynter hynrei lehse shi kynta haduh arkynta duh. Namar kane ka jingpynlip bor ding mynmiet ka la buh ïa ki paid nongshong shnong ha ka jingma ba la jur sa tang ki nongtuh nonglute bad ki jyllei ki nongdih drok ha ka por miet”.
Ym tang katta wat kane ka pynthut ïa ki khynnah skul bad samla pule ruh kiba khie step dang step phyrngap ban pule ïa ki kot ki sla jongki. Sa kawei pat wat ki hospital ruh ki shah ktah bha namar ha ki hap ban pynmeh beit da ki generator ban pynmeh bording beit ha ki kamra khamtam ha ICU. Kumta lada jia ba thut ki generator ka buh ïa ka jingim briew ruh ha ka jingma kaba khraw.
Sa kawei u la ong ba wat ki Press kiba shon ïa ki kot khubor ki shah ktah bha bad kiba bun ki dei kiba don hapoh ka Mawlai Constituency. Kumta u kyntu ïa u symbud myntri rangbah ban pyrkhat lem bad shim khia ïa kine ki jingeh kiba la kdew haneng.