Shillong, Nailar 18: U MDC ka BJP na Tura u Bernard N Marak u la thoh sha u Myntri Rangbah ka Assam bad u Chairman ka North East Democratic Alliance (NEDA), u Himanta Biswa Sarma, ha kaba u la kyrpad na ka bynta ka BJP ba kan shimti ïa ka bor synshar ha Garo Hills Autonomous District Council (GHADC).
Kane ka jingkyrpad ka la wan hapdeng ki jingkynnoh ba ki rukom pynïaid kam ka sorkar Meghalaya ka la pulom ban pynneh ïa ka jinglong kongsan ka GHADC bad ban pyntreikam ïa ka Garo Accord, ba la soi ha u snem 2014.
Ka Accord ka thmu ban wanrah biang ïa ka jinglong laitluid bad ki jingtreikam sha ki ADC ha Meghalaya.
Ha ka shithi sha u Sarma, u Marak u la ong ba ka GHADC ka la mad ïa ka jingtyrkhong pisa, ha kaba ki nongtrei ki la shah ieh khlem jingsiew tulop la kumba 43 bnai, bad ki la shah sloit na ki jingkitkhlieh.
Ka jinglah ban ai ka jingshakri ka Council ïa ki paidbah la shah pynhiar dor na ka daw ka jingpynslem ka sorkar jylla ban pynkynriah ïa ki tnat bad ka jingbat ka jong ka ïa ki bhah khajna.
“Kum u Chairman ka NEDA, ka jinglong nongïalam jong phi ka la long kaba kongsan ban wanrah ka jingpynthikna ïa ka jingneh ki kam pynroi ha kane ka thaiñ. Nga kyrpad mynta ba phin pyrkhat ban aiti noh ïa ka bor synshar jong ka GHADC sha ka Bharatiya Janata Party (BJP),” ong u Marak.
“Ki paid Garo Hills ki la ai ka jingshaniah ha ka BJP da kaba ai ka vote jong ki na ka bynta kaba bha ka synshar khaddar, kumta nga kyntu ba phin sdang noh ka jingïasyllok hapoh ka NEDA bad ban bthah ïa ki sienjam ban pynsuk ïa kane ka jingpynkynriah bor synshar,” u la bynrap.
