Shillong, Naiwieng 08: U Lat ka jylla Meghalaya u CH Vijayashankar ha ka sngi Thohdieng u la pynpaw ïa ka jingsngewkhia halor ki jinglong jingman kiba la jia hapoh skulbah North Eastern Hill University (NEHU) na ka daw ka jingpynlong ïa ka jingiakhih shong shah thngan kaba la pynlong ruh ïa ki samla pule ba kin kem pang bad ban poi sha hospital ha kaba u la kyrpad ruh ïa ki samla pule ba kin sangeh noh kane ka jingïakhih shah thngan jong ki.
Lah ban pynkynmaw ba kane ka skulbah ka la mad ïa ka jinghap ban khang khyrdep noh na ka daw ka jingïakhih jong ki samla pule hapoh ka lama jong ka North Eastern Hill University Students Union (NEHUSU) bad kaba la kyrshan ruh da ka Khasi Students Union (KSU-NEHU Unit) ha kine ki 4 sngi ba la leit kum ka dak jingpyrshah ïa ka jingbym pyndam noh jong u vice chancellor u Prof P S Shukla ïa ka jinthungkam beaiñ ïa u registrar bad deputy registrar.
Ha ka jingïakynduh bad ki nongmihkhmat jong ki nonghikai, kiba dei ki nongïalam jong ka NEHUTA bad MeTTA ha Raj Bhavan, u Lat ka jylla u la pynpaw ka jingsngewkhia kaba jur halor kane ka jingïakhih shong shah thngan da ki samla pule ka NEHU, ha kaba ka la pynlong ïa ki 3 ngut ki samla pule ban ïohpang. U la kylli ruh halor ka jinglong jingman na ka NEHUTA bad u la pynlong ruh ka jingïasyllok kaba bniah halor ki jingeh ba la mad da ki samla pule, kumjuh ruh ki nonghikai bad ki nongtrei jong ka NEHU.
Haba jubab ïa ki jingkyrpad jong u, ki dkhot ka NEHUTA ki la pynpaw ïa ki katto katne ki mat kiba la long ki jingeh ba la mad da ka NEHU, da kaba banjur ruh ïa ka jingdonkam ka jingïatreilang ban khmh ïa kine ki kam na ka bynta ka jingmyntoi ki samla pule, ki nonghikai bad ki nongtrei bad ka imlang sahlang baroh kawei. Ki la kyrpad ruh ïa ka jingtuklar jong u Lat hapoh ka bor ka jong u kum u Chief Rector jong ka NEHU.
Hadien ba la sngap bha ïa ki jingeh ba la pynpaw da ka NEHUTA bad MeTTA-NEHU, u Lat u la kyrpad ïa kine ki seng ban ïathuh ïa ki jingeh kiba thikna bad u la ai jingmut badei ban don ka jingshim rai kaba neh slem.
U la ai jingmut ïa ki ban ai da ka jingthoh kaba bniah khnang ban lah ban pynmih ïa ki rukom pyrkhat kiba biang lang ïa baroh. Na ka liang u Lat u la pynthikna ïa ki ïa ka jingkut jingmut jong u ban pynsuk ïa ki jingïasyllok bad ki riewshemphang bapher bapher kynthup ruh ïa u Vice-Chancellor bad ki bor pynïaid jong ka sorkar jylla khnang ban lah pynkutnoh ïa kine ki jingeh kham kloi katba lah.
U Lat ka jylla u la banjur ruh da kaba ong ba ka NEHU, kum ka jaka pule kaba ai ka jingshakri ïa ki nongshong shnong kane ka thaiñ shatei lammihngi jong ka ri India, mynta ka kynti ka la don hapdeng ka jingdkoh da ki jingeh kiba bun kiba ktah ïa ka pule puthi bad ki rukom pynïaid kam pynïaid jam, kiba suki suki kin ktah ïa ka kynhun ki samla pule. U la banjur ïa ka jingdonkam ban pynthikna ba ki rukom treikam jong ka NEHU ki dei ban long kiba ïaid beit na ka bynta ka bha ka miat jong ki samla pule jong ka.
Na ka liang u Lat u la kyrpad ruh ïa ka jingïarap jong ka NEHUTA ban phah ïa ka khubor jong u sha ki samla pule, kaba kyrpad ïa ki ban pynkutnoh ïa kane ka jingïakhih shah thngan. U la pynthikna ïa ki ba baroh ki sienjam kiba donkam na ka liang jong u un sa shimkhia khamtam halor ka koit ka khiah ki samla pule.
U Lat u la khot ïa baroh ki kynhun ban wad ïa ki rai kiba neh na ka bynta ka bha ka miat jong ka NEHU bad ki kynhun jong ka baroh kawei.
Kum u Chief Rector jong ka NEHU, u Lat u la pynthikna ba un ai baroh ki jingkyrshan kiba kongsan ban pyllait na kane ka jingeh kham kloi katba lah bad ban pynneh ïa ka burom jong kane ka jaka pule kaba donkam.
