Kyrpad u CEM ka KHADC ïa u Dy CM ban pyllait noh ïa ka bhah jong ka District Council

Shillong, Naiwieng 12 : U Chief Executive Member (CEM) jong ka KHADC, Bah Winston Tony Lyngdoh ha ka sngi Balang ula leit ban kynduh bad kyrpad ïa u Symbud Myntri Rangbah ka Jylla Bah Prestone Tynsong ban phah pyllait noh kham kloi ïa ka bhah pisa kiba dei na bynta ka council na ki marpoh khyndew kiba la kot sha ka 50 klur tyngka.
Haba kren sha ki lad pathai khubor hadien ka jingïalang, u CEM u la pyntip ba u Bah PrestoneTynsong u la kular ban peit bniah ïa kane ka kam bad u la ai katto katne ki jingai jingmut na ka bynta ban pynbha ïa shuh shuh ïa ka jingpoi ka pisa, da kaba kyntu artad ïa ka jingïatreilang ryngkat ryngkat bad u secretary kumjuh bad u joint secretary jong ka tnad.
Halor ka jingtyrwa jong ka sorkar ban siew tulop ïa ki nongtrei District Council, u CEM u la ong ha ka jingïakynduh bad u Deputy Commissioner bad ki heh kiba dei peit, u la kynthoh ba ïa ka jingïarap pisa kum ka grant ne kiwei pat kiba la mynjur na ka bynta ka GHADC dei ban pynïar ruh sha ka KHADC.
“Lada ka sorkar ka pyllait ïa ka bhah jong ngi ha ka por kaba biang, ka KHADC kan nym don jingeh ban pynthikna ba ka council kan ïaid beit ïaid ryntih”, u la bynrap.
Shuh shuh u la ong ba watla u Symbud Myntri Rangbah ka Jylla u la lah ban ïoh ïa ka kaiphod jong ka sub committee (ba la aiti ban ïakynduh bad ka KHADC halor ka jingtyrwa jong ka sorkar), hynrei ïalade pat u ong ba um pat ïoh pdiang satia.
U la ong ruh ba na ka 60-70 klur ka pisa ba ki dei ban ïoh ka sorkar ka dang pyllait tang 20 klur dang shen bad kaba sah mynta ka dang kot sa kumba 50 klur tyngka ei ei.
“Lada ka sorkar hi ka burom ïa ka hok kaba ngi dei ban ïoh, ngi lah ban pynthikna ba ka council kan lah ban pyntyllun khlem jingeh ïa ka kam”, la bynrap biang u CEM.