Kyrpad u bah Allan ïa ki paidbah ba kin ym ngeit kulmar ïa ka khubor khlieng- tyngba lyngba ki social Media

Shillong, Nailur 22 : Ha kaba ïadei bad ka jingïakhih jong ka AKMTTA kaba la dawa ba khang noh ïa ki kali Tourist kiba wan na Assam tang ha ki hotel ha Shillong ne Sohra, la ïoh jingtip ba kasorkar jylla ka la khot ïa ki dkhot jong katei ka Association sha ka miej jong ka jingïakren ka ban long ha ka 23 tarik mynta u bnai. Kum ban shu pynkynmaw ba ha ka 18 tarik jong ka taiew ba la dep ka DC jong ka East Khasi Hills ka kong RM Kurbah ka la khot ïa kitei ki dkhot sha ka Office jong ka bad kyntu ïa ki dkhot jong ka AKMTTA ban weng noh ïa ka jingïakhih na ka daw jong ka jingïakhih kaba la bud pat sa na ka liang jong ka jylla Assam ha kaba la khang ïa baroh ki kali na Meghalaya ban rung shathie bad ruh na ka daw jong ka Public Interest Legation (PIL) kaba don hakhmat ka ïingbishar jong ka Meghalaya High Court.
ïa katei ka PIL la leit leitrah da u bah Alan West Kharkongor, uba long u rangbah uba ju kyntiew ïa ka kam jngoh kai pyrthei jong ka jylla naduh ki por ba ka Tourism ka dang lung ha kane ka jylla. Kaktum ka PIL u bah Alan U la kyrpad hakhmat ka ïingbishar badon burom ba kan kyntu ïa ka Sorkar ba kan khot ïakren noh ïa ka AKMTTA bad ruh ba kan thaw noh ïa ki lad ki lynti kumno ba kitei ki nongñiah kali kamai jong ka jylla kin ïoh ïashim bynta ha kane ka kam jngoh kai pyrthei bad ruh ban kin kham bha ka kamai kajih da kaba kin ïoh ban kit lang ïa ki tourist sha ki jaka jngohkai pyrthei bapher bapher jong ka jylla.
Ka PIL jong u bah Alan ka kyrpad ruh ïa ka ïingbishar badonburom ba ka sorkar ka dei ban thaw noh da ka policy kaba thymmai kumno ban pynurlong ïa ka jingangnud bad ka jingdawa jong ki nongñiah kali Tourist ka Jylla. Shuh shuh U bah Alan lyngba katei ka PIL ula kyntu ïa ka High Court badon burom ba ban kyntu ïa ka AKMTTA ban pynsgneh noh ia ka Strike kaba pynthud ïa ka leit ka wan jong ki Tourist naba kan ïalam sha ka jingkulmar, ka jingpynthud ïa ka kam jngohkai bad ka jingduhnong hi jong ki nongshnong shnong jong ka jylla.
Dang ha ki khyndiat sngi ba la dep ki la don ki riewshim kabu kiba la pynsgewthuh bakla ïa katei ka PIL jong u bah Alan West Kharkongor da kaba kynnoh ba u dei u Agent jong ki Nongñiah kali ka Assam, u Ingkhong shyllangmat bad u Riewkhwan myntoi shimiet. Na ka liang jong utei u Riew Rangbah u bym pat kwah ban kren than ïa mynta naba ka ïingbishar kan dang shong ha ka sngi nyngkong, u la shu ong ba ka long kaba sngewsih ban ïohi ïa ki Riew jyndong ha ka jingshmephang kiba shu laplah khlem da tip ïa ka sdang ka kut bad pynsgewthuh bakla ïa u paidbah. U la ong ba ha ka jingshisha ka PIL kaba u la buh hakhmat ka ïingbishar ka long ban peit lem ïa ka khia ka shon jong ki nongñiah kali jong ka jylla hynrei ki riweshim kabu ki pynwandur jubor ïa u kum u nongïaleh pyrshah ïa ka bha ka miat ka jaitbynriew. U la ong ka jingshisha kan sa paw bad kyrpad ïa ki paidbah ba kin ym ngeit kulmar ïa ka khubor ka khlieng ka tyngba lyngba ki social Media.