Shillong, Naitung, 21: Ki samla kiba don jingduna ha ki dkhotmet ha ka sngi Palei ki la kyrpad ïa ka Sorkar Jylla ban shna noh la kumno kumno kawei ne ar tylli ki Government Inclusive School hapoh kane ka jylla kiba syriem thik kum ka Bethany Society kaba don ha Laitumkhrah, Shillong khnang ba ki khynnah kiba don jingduna ha ki dkhotmet kin ïoh ïa ki jinghikai kiba paka.
U President jong ka Meghalaya Pradesh Trinamool Youth Congress (MPTYC) East Khasi Hills District u samla Waiki Snaitang ha ka jingïakren bad ki lad pathai khubor u la ong, “kumba ka long mynta ki khynnah kiba duna dkhotmet kiba leit sha ki skul kiba hikai kyrpang ïa kiba don jingduna ha ki dkhotmet ki ïakynduh mawsiang na ka daw ka jingbym lah jong ki nonghikai ban ai ïa ka jinghikai kaba kyrpang.”
“Ha Shillong dei tang ka Bethany Society ka skul kaba kham biang (ban ai jinghikai ïa kiba duna dkhotmet). Tang ka Jyoti Sroat kan lah shaei ban ai ïa ka jingshakri sha baroh ki khynnah. Ki bun bha ki khynnah kiba duna dkhotmet kiba thrang ïa ka jingnang jingstad kiba wad Admission ha Jyoti Sroat hynrei kim ïohlad. Lada dei kiba wan na ki longing kiba duk ki hap shu shong noh ha ing,” u la ong.
U la kyntu ruh ïa ka Sorkar ban buh ïa ki Computer Training Centre ba la pynïaid da ka Sorkar namarba kiba bun kiba la nang la stad ki hap ban leit pyntbit shabar ka jylla namarba hapoh kane ka jylla kam don satia ka jaka ban shah hikai pyntbit.
“Ki don ki khynnah kiba wan na ki longiing baduk kiba angnud ban leit pule shabar hynrei kim ïohlad hynrei lada ki don ki jaka hikai pyntbit hapoh kane ka jylla kan long ka jingmyntoi bad ngim donkam shuh ban leit shabar ka jylla bad nga ngeit ba ngin sa kiew shaphrang,” u la bynrap.
Haba pynpaw ba ka ïohkam ïohjam ka dei ka bynta kaba kongsan wat ïa ki briew kiba duna dhotmet, une u nongïalam ka MPTYC u la ong, “ngin kren ïa ka jingshisha ba ka bhah kaba 4 percent katkum ka PWD Act, 2016 ha Meghalaya kim pdiang satia. Nga kyrpad ïa ka Sorkar Meghalaya ba kan pyntreikam pura ïa ka bhah kaba 4 persen namarbar kane ka dei hok bad ka bhah jong ngi bad lada ha kiwei kiwei ki jylla ki pyntreikam ïa kane ka Aiñ hynrei balei pat ha kane ka jylla ym shym la lah satia ban pyntreikam.”
U la ïathuh ruh ba ki don ki Ophisar ha ki tnat treikam ka Sorkar ba kiba ju kynthoh ïa ki briew ki bym don ka bor ïohi jong ki khmat ba kumno kin trei haba kim lah ban ïohi. “Nga kwah ban buh jingkylli ïa kita ki briew kiba ong kumta, hato shwa ba phin kren phi la ju pyrkhat arsien? Hato phi la ju wadbniah shaphang jong ngi? la kynthoh u samla Snaitang bad bynrap ba katkum kane ka juk Digital ki briew kiba duna dkhot met ruh ki lah ban trei ïa ki kam kumba long sha kiwei pat ki jylla.
Ha kaba ïadei ki skhim bad ki baibam, u la ïathuh ba ki briew kiba duna dkhotmet ki ïoh jingïarap tang T.500 shi bnai. “Kumno ngin im tang T.500 shibnai. Lada long kumno kumno ruh ka Sorkar ka ladei ban ai jingïarap T.2000 shi bnai khnang ba ngin im namarba ki mar ki mata ki la kiewdor lut nadong shadong,” u la ong.
