Shillong, ïaïong, 06: Ki nongtrei jong ka Mawmluh Cherra Cement Limited (MCCL) kiba don hapoh ka shatri jong ka Mawmluh Cherra Cement Employees Union (MCCEU) ki la kyrpad ïa ka Sorkar Meghalaya Democratic Alliance (MDA) ba kan pyntreikam noh pura ïa kane ka karkhana kaba dei ka pliangja jong ki paidbah nongshong shnong ka thaiñ Sohra.
Dang ha kine ki khyndiat bnai ka Sorkar ka la shim ïa ka rai ban pyntreikam da ka Joint Venture khnang ban pynim biang ïa kane ka karkhana pynmih dewbilat ba la rim tam hapoh kane ka Jylla Meghalaya kaba la don hapdeng ka jingpang swai.
Ha ka jingïakren bad ki lad pathai khubor, u Secretary jong ka Union u Bah Pynskhem Lyngdoh u la ong, “ngi la phah da ka jingthoh sha u Managing Director jong ka MCCL, Head Office, Shillong ba pyllait noh ïa ka tulop jong ngi ki nongtrei tad haduh ba ka Karkhana kan da treikam pura.”
“Ngi kyrpad ruh ban pyllait noh ïa ki jingsiew kiba dang sahteng jong ki nongtrei kham kloi katba lah kumba la pynbna da ka Sorkar,” ong u Bah Lyngdoh.
U la ong ruh ba ka jingangnud jong ka Union ka long ba ka Sorkar Jylla ka la dei ban pyntreikam pura noh ïa kane ka karkhana namarba haduh mynta ym shym la pynmih shuh ïa ka dewbilat naduh ba ka National Green Tribunal (NGT) ka la pynjari ïa ka jingkhang ban tih bad shalan ïa u dewiong ha kane ka jylla.
Ha kaba ïadei bad ka jingpan jong ki nongtrei ïa ka Voluntary Retirement Scheme (VRS), u Bah Pynskhlem Lyngdoh u la ong, “ngi kyrpad ïa ka Sorkar ba kan pyntreikam noh ïa ka Voluntary Retirement Scheme (VRS) kumba la pyntreikam da ka Sorkar naduh u snem 2017 khnang ba ki nongtrei la dei ban shongthait kin dup ban thawlad ynda ki la shongthait na ka kam kaba ki trei.”
Katkum ka jingïathuh jong u President ka Union u Bah Shanlang Diengdoh, ki nongtrei jong ka MCCL kiba don ym duna ïa ka 300 ngut eiei ki la im khlem tulop mynta da ki bnai bad ïa mynta hi ka sorkar ka shu kyrsha jingïarap shisien lai bnai.
