Shillong, Naitung 09: Ha ka sngi Saitjiañ jong ka 9 tarik Naitung ki samla kiba ju im ja na ka kamai ban leit on bad leit shaw briew da kaba kamai da ki thuk thuk ar shaka lyngba ka kompeni kaba la ju tip kum ki rapido ki la pynpaw ïa ka jingbym sngew ïahap ïa ka jingkhang ka Regional Transport Authority (RTA) ban kamai lyngba kane ka kam namar ki long pyrshah ïa ka kyndon jong ka Motor Vehicle Act 1988.
Haba kren sha ki lad pathai khubor ha ka jingpynlong ïa ka jingïakynduh lang jong ki, ha Madan Students Jaiaw kine ki samla ki la kyrpad ïa ka sorkar ba kan thaw lad ba nym pynduh ïa ka jingkamai ja kpoh jong ki, bad ki la ong ba lada ka sorkar kan ai noh ïa ki da ka permit ki long kiba kloi ban pdiang bad wat ban siew ïa kino kino ki khajna kiba ka sorkar ka buh.
Don ruh napdeng kine ki samla kiba ïathuh ba ki shim wat da ka ram na ki bank ban ïoh thied ïa ki ar shaka khnang ban ïoh kamai ki la pynpaw ba kane ka jingkhang ka RTA kan buh jingeh shi katdei ban siew ïa ka ram kaba ki la shim.
Shuh shuh don ki katto katne ki nongkamai da kane ka kam ki ong ba ‘lada kamai hok ha surok shah khang lada tuh ruh shah kem kaei pat ka lad kamai kaba lah ban pynïoh ïangi”
U Mawphor ha kine ki khyndiat taïew kiba la dep la ïoh jingtip ba kane ka kompeni kam pat shym la ïoh satia ïa ki permit ban kamai ha nongbah Shillong kat kum ka jingtip ba la ïoh na ka ophis jong u DTO jong ka East Khasi Hills.
Shuh shuh u Mawphor ha kine ki khyndiat taïew u la pyrshang ban ïakren bad ki katto katne ki paidbah kiba ju pyndonkam da ka Rapido ha ka leit ka wan ki la pynpaw ba kiba bun hi na ki nong kamai ki ju shim kabu ha kaban oh dor kham palat ban ïa kaba ka Rapido App ka buh dor ha ka por ba ki buk ïa ka kine ar shaka.
Ki don ruh ki katto katne kiba pynpaw ba kine ki nongkmai da kine ki thuk thuk kham bunsien ki ju phah cancel noh ïa kaba ki la online khnang ba kin leit buh da kata ka offline ban ïoh oh dor katba ki sngew bit.
Haba u Mawphor u ïakren bad ki katto nongñiah kali kamai ha nongbah Shillong kiba pynpaw ïa ka jingsngew bynñiaw ïa kine ki thuk thuk namar ki kamai jem khlem donkam ban siew ïa kano kano ka bai permit ne khjna katba ma ki pat ki hap siew man la u snem sha ka sorkar bad kine ki ar shaka kiba kamai ki knieh noh ïa ki nongleit nongwan kiba pyndonkam da ki taksi khamtam ha ki thaiñ Motphran.
