Shillong, Jylliew, 06: Ka Khasi Jaiñtia Deficit School Teachers Association (KJDSTA) ka la kyntu ïa ka Sorkar Jylla ban pyllait ïa ki nonghikai skul Deficit na ka Meghalaya Education Grant( (MEG).
Ha ka jingïakren bad ki lad pathai khubor hadien ka jingïalang, ka President jong ka KJDSTA ka Kong A.M Lyngwa ka la ïathuh ba ka Association ka la aiti ïa ki jingai jingmut sha ka tnat Pule Puth ha kaba ïadei bad ka MEG ha ka jingïalang ba la pynïaid da u Commissioner & Secretary in-charge Education u Vijay Kumar Mantri bad ki nonghikai skul Deficit ha ka sngi Thohdieng.
“Ngi kwah ba ka Sorkar kan ai ha ngi ïa ki jingkular ba ngin dang ïai bteng ban shakri kum ki nonghikai Defiict bad lada la pyntreikam ïa ka MEG, ka jingbei pisa (ban siew tulop) ïa ki nonghikai skul Deficit ka dang dei ban bteng. Ngi la ïoh ka jingkular ba yn pyllait ïa ki nonghikai jong ki skul Deficit ba mynta na ka MEG,” ka la bynrap.
Katkum ka jingong jong ka, ki post jong ki nonghikai skul Defiict kin ym don shuh ynda ki nonghikai kiba mynta ki la shongthait na ka kam hikai.
Haba kylli, ka Kong Lyngwa ka la ong, “kum ka Association, ngi dang kwah ba ka Deficit System kan dang bteng. Hynrei, ki (Sorkar) wanrah ïa ki jingpynshisha kiba biang (halor ka jingtyrwa ban pynkut noh ïa ka deficit system), lehse kaba lah ban long kaba bha ha ki por ki ban sa wan.”
“Ka jingthmu hi jong ka Sorkar ka long ban pynduna ïa ki kyrdan jong ki nonghikai skul bad ban buh ïa ki hapoh kawei ka rynsan “MEG”,” ka la ong bad bynrap, “ka jingsngewkhia jong ka Sorkar mynta ka long ba ki dang don ki nonghikai kiba ïoh ka tulop kaba rit tang T. 10000 ne T.20000 hajar bad ki don kiba ïoh tulop haduh shi lak shi bnai. Namarkata, ka jingthmu ka long ban pynbeit ryntih ha kaba siew ïa ka tulop hapdeng ki nonghikai ha ka jylla.
Shuh shuh ka la pyntip, ki jingmyntoi kum ka Centralized Provident Fund (CPF) bad ka penshon kin dang ïai bteng na ka bynta ki nonghikai jong ki skul Deficit kiba mynta bad ïa kiba dang shu thung thymmai.
