Mawkyrwat, K’lyngkot 09: Ki paidbah jong ka San Shnong Manad Area hadien ba ki la ïohi ba ka jingwan tei ïa ka jaka sumar ne ka Sub Centre hapoh jong ka Shnong Pyndenlyngdoh ki la don ka jingkyrmen namar kin sa ïoh ka lad ban leit shim ïa ki dawai da shin haba don ha ki jingshitom hynrei phewse haduh mynta kane ka jingkhmih lynti kam shym la urlong satia.
Namarkata, haba ki shem ïa kane ka jingeh kim banse ban mih shakhmat ban dawa bad kyrpad ïa ka tnad jong ka koit ka khiah jong ka Jylla Meghalaya, khamtam eh ïa u nongmihkhmat jong ka Mawkyrwat Constituency, u Bah Renikton Lyngdoh Tongkhar, ba ki la dei ban wan plie noh ïa ka Manad Sub Centre kaba don ha Pyndenlyngdoh, South West Khasi Hills District khnang ba kan long ka jingkyrkhu ïa ki paidbah ba donkam jingïarap.
U Bah Ready Shylla, President jong ka Synjuk ki Rangbah San Shnong Manad Area haba kren ha ki lad pathai khubor ula ong ba khnang ba kan ym long kum ka ïing jah ka la sngewdei namar kata ban pyntrei kam noh mar dor ïa kane ka jaka sumar ne Sub Centre khnang ba ki paidbah kin ïoh jingmyntoi katkum ka jingdonkam lyngba ki lad jingsumar bapher bapher da kaba leit phah sumar noh ha kane ka jaka ai jingsumar na ka bynta ki shitom ki bym da sngewdonkam ban kiew shaduh Mawkyrwat.
“Kane ka jaka sumar ka la long kaba la-bit la-biang nadong shadong lada pyntreikam noh ïa ka namar ka bording, ka um, ki kamra ruh ki la i biang pura”, ïathuh u Bah Ready Shylla bad ïa ki kam ruh dei ban bhah noh khnang ba kan long ka jingmyntoi ïa ki paidbah.
Ha kajuh ka por u la pynkynmaw ruh ba ka jingangnud jong ki paidbah ban don ïa ka jaka sumar ne Sub Centre ka la dei naduh ki por ba u (L) Rowell Lyngdoh u dang long kum u nongmihkhmat jong ka Mawkyrwat Constituency bad kumjuh ruh kum u Myntri ha ka Sorkar jong ka Jylla Meghalaya hynrei ha kata ka por ym shym la urlong.
Namarkata, u la pynkynmaw ba ki por bad ki snem ki la ïaid bad dei tat hadien u Bah A. L. Hek u la shimti ïa ka kam kum u Myntri ka tnad ka koit ka khiah jong ka Jylla Meghalaya bad u la khot kyrpang ïa ki ‘riew rangbah jong ka San Shnong Manad Area ba ma u u la kular hakhmat jong ki ban pynïoh bad mynta kane ka Sub Centre ka la ïeng ka jingtei hynrei sngewsih pat ba haduh mynta pat ym pat shym la ïoh lad ban pyntreikam ha ka rukom kaba dei.
