Kyrpad ka UDP ïa ka sorkar ban khot ïa baroh ki party ban ïa kren halor ka Reservation Policy

Shillong, Jymmang 28 : Ka United Democratic Party (UDP) ka la kyrpad ïa ka sorkar ba kan khot noh mardor ïa ka jingïalang jong baroh ki sengsaiñ pyrthei ban ïa kren halor ka Job Reservation Policy.
“Baroh ki MLA jong ki party bapher bapher bad ruh ki nongïalam kin kynduh ruh ïa u Myntri Rangbah la shai ka sngi ban kyrpad ïa u ban khot noh ïa ka jingïalang jong baroh ki party ban ïa kren halor ka Reservation Policy,” ong u Vice President ka UDP, u Bah AF Dkhar ha kane ka sngi U Blei.
U ong ruh ba ka party ka buh ruh ïa ki jingai jingmut ha katei ka jingïalang jong baroh ki party.
Na ka liang utei u heh UDP haba jubab halor ka jingdawa jong ka VPP ban bishar bniah ïa ka Reservation Policy katkum ka jingbunbriew, u Bah AF Dkhar u la ong, “Kata kadei ka jingïohi jong ki hynrei ngi pat ngi don la ki jong ki jingai jingmut namar ngi la ïohi shibun ki jingduna ha kane ka Reservation Policy kaba mynta bad kumta ngi kwah ban peit shwa ïa kata bad kaba ar pat ngin sa kdew ruh haba ïadei bad kiwei ki pat kiba ïadei bad katei ka Policy,” u la ong.