Kyrpad ka tnad Transport ïa ka PWD ban pyndep kloi ïa ka surok na Mawlai By-pass sha Umroi

Shillong, Naiwieng 3 : U Symbud Myntri Rangbah ba khmih ïa ka Tnad Transport u Ma Sniawbhalang Dhar ha ka sngi Ba-ar, ula ong ba ka Tnad kala kyrpad ïa ka tnad PWD ba kan pyndep kloi noh ïa ka jingshna ïa ka surok ba thymmai kaba na surok Mawlai By Pass shaduh Kad Liengsuiñ Umroi khnang ba ki bus heh ( Night Super Bus ) kin lah ban pyndonkam ïa kane ka surok ban poi sha Inter State Bus Terminus (ISBT) ha Mawlai Mawiong.
“Ngi ka kyrpad ïa ka PWD ban pyndep noh kham kloi kat kaba lah ïa kane ka surok thymmai. Ki la aiktien sha ngi ba ki don jingthmu ban pyndep shna ïa kane ka surok hapoh ka shisnem” ong u Bah Sniawbha.
Ula pynpaw ïa ka jingkyrmen ba hadien ba dep kane ka surok, ki bus ba heh kin sa lah ban wan ban kamai biang na ISBT.
Kane ka surok thymmai kan sdang na Kad Liengsuiñ Umroi bad kut ha Mawlai By-pass. “Namar kata, ki bus heh ki lah ban wan beit beit sha ka ISBT na Mawlai By-pass” ula pyntip.
U pyntip ba ïa mynta, ka jingpyrkhing ïa ka jingkhia jong ki kali ba ïaid na Jingkieng Umroi, kala ktah bha ïa ki nongpynïaid bus bad kumjuh ruh ki trai dukan ha ISBT.