Kyrpad ka sorkar jylla na u Myntri Rangbahduh ban pynlait noh 700 klur ka pisa ba sah jong ka JJM

Shillong, Nohprah 03: Ka sorkar jylla ka la rai ban wad ka jingtuklar jong u Mynri Rangbahduh ka ri u Narendra Modi ban pynlait noh ïa ka pisa T. 700 klur ban ïoh pynlait noh ïa ki bill ba dangsah sha ki contractor kiba pyntreikam ïa ka Jal Jeevan Mission (JJM) project ha Meghalaya ha shwa ka Christmas.
“Ka Meghalaya ka dei ka jylla Christian bad ka dei ka kamram jong ka sorkar jylla ba ngi dei ban sumar ïa la ki jong ki briew. Da kaba pyrkhat ba ngin buh ki jingpyrshang bad pynngeit ïa ka Sorkar India ban pynlait noh ïa ka pisa sha baroh ki jylla Christian bad kynthup ïa ka Meghalaya,” ong u Myntri ka PHE u Marcuise N Marak haba kren sha ki lad pathai khubor ha ka sngi Balang.
U ïathuh ba u Myntri Rangbah ka jylla u Conrad K Sangma u la ïakynduh ïa u Myntri ka sorkar pdeng jong ka Jal Shakti u CR Patil bad aiti ïa ka dorkhas halor kane kam mynshem snem.
“Lada kane kam urlong, nga la dep ong ïa u Myntri Rangbah ba u dei ban kynduh noh ïa u Myntri Rangbahduh ka ban pynbeit ïa kane ka kam,” ong u Marak.
Katkum ka jingong u Myntri ka jingslem ban pynlait ïa ka pisa jong ka JJM ka dei ka kam jong ka sorkar pdeng naba ka la ktah lut ïa baroh ki jylla.
“Ki bill ka JJM kaba la kot sha ka T. 700 klur kaba khlem pat siew sha baroh ki contractor naba ngi dang hap ban ïoh ka jingpynlait pisa na ka sorkar pdeng,” u la ong da kaba bynrap, “Namar ki bill basah, ngim lah satia ban kyrpad ïa ki contractor ban trei bha ïa ka kam, kumta ki kam ki sahkut noh.”
Da kaba ong ba palat 83% ki kam JJM la pyndep ha ka jylla, u Marak u la ong ba ka sorkar pdeng ka la pynjlan ïa ka jingbuh por haduh u snem 2028.
“Ka sorkar India ka la bthah ïa baroh ki jylla ban sngewthuh ka jingkiew ka jingpynlut kaba la ktah ïa jan baroh ki project,” da kaba ong ba ka tnat ka la pynbna ba dei ban pyndep ïa baroh ki projek ba dangsah.