Kyrpad ka sorkar jylla ïa ka sorkar pdeng ban bteng pyntreikam ïa ka skim Border Area

Shillong, Nailur 13 : Ka sorkar jylla ka la kyntu ïa ka sorkar pdeng ba kan ïai bteng ban pyntreikam ïa ka skim pynroi ha ki shnong khappud ba la tip kum ka skim Border Area Development Programme (BADP) ha kane ka jylla.
Ïa kane la pyntip da u Myntri ka tnad Border Area, Bah Lahkmen Rymbui haba jubab halor ka Zero Hour Notice ba wanrah da u MLA ka Mawsynram, Bah HM Shangpliang ha ka Dorbar Synrai kaba long hynne ka sngi Ba-ar.
U Myntri ha ka jubab u la ong ruh ba ka tnad ha ka shithi kaba 2tarik u Nailar ki la kren ïa katei ka mat bad ka Ministry of Home Affairs (MHA) ban bteng ïa ka skim BADP na ka bynta ka jingmyntoi jong ki paidbah ba sah ha ki shnong khappud.
U la ong ruh ba ka MHA ha ka shithi ba ki phah ha ka 06tarik Ïaiong mynta u snem ki la bthah ïa ka BADP ban bteng ïa ka jingtreikam haduh u Nailur 30 bad ym dei shuh ban phah ïa ka Annual Action Plan na bynta u snem 2022-23 sha ka Ministry.
La kdew ruh ba ha katei ka shithi, ka MHA ka la bthah ba yn ym don satia ki kam ba thymmai ban mynjur hapoh ka BADP bad kumta ka kyntu ïa ka sorkar jylla ban jied ïa ki kam ba la dep mang. La ong ruh ba dei tang ki kam kiba la sdang ba kin bteng pyndep katba ïa ki kam kiba ym pat sdang ym dei satia ban pyntreikam.
U la pyntip ruh ba ki la ïoh pdiang ïa ka email na ka Ministry kaba la kyrpad ban pyntip ïa ka jingïoh pisa na ka bynta ki jingtrei kiba dang ïaid ha ka BADP online management system (OMS). La ïathuh ruh ba ïa baroh ki jingtip kumba la pan bad bthah da ka Ministry la dep ban pynrung ha ka BADP OMS na ka bynta ka samoi treikam jong u 2020-21.
Na ka liang u Myntri u la ong ruh ba ka sorkar jylla ka dang pyntreikam mynta ïa ki 99 tylli ki projek kiba la dep ban mynjur ha u snem 2020-21.
Ha shwa kane, u Bah Shangpliang u la pynpaw ka jingbynniaw halor ka jingbym pyllait shuh ïa ka pisa na ka BADP la ar snem mynta. U la ïathuh ba u la dep ban phah haduh 2.12 klur tyngka ka skim na u bynta u snem 2021-22 bad 2.28 klur tyngka na ka bynta u snem 2022-23 na bynta ki shnong khappud kiba hap ha Mawsynram Block bad ïa kane la dep ruh ban mynjur da ka State Level Screening Committee.
Katkum ka jingong jong u, ka jingbym pyllait ïa ka song pisa ka la ktah haduh katta katta ïa ka jingpyntreikam pynroi ha ki shnong khappud.
“La bthah ruh ïa ki ophisar jong ki tnad ban buh ïa ki projek na ka bynta ki san snem ban wan ha ryngkat ka jingsyllok bad ki MLA namar ki MLA ki hap ban syllok bad ki shnong bad kiwei kiwei. Mynta ba ngi la dep ban pynbiang ïa ka thup jong kitei ki kam hynrei haba kim wan pat, baroh ki kti ki kdew sha u MLA namar um lah ban pynurlong ïa ki projek,” u la ong.
Shuh shuh u ong ruh ba katei ka jingjia ka ktah bha ïa ki kum ki MLA bad dei na kata ka daw u kyntu ïa ka tnad ba kan wanrah da ka jubab kaban pynhun lang ïa ki paidbah halor ka jingbym ïoh ïa ka song pisa ha kine ki ar snem ba la dep.
Halor kane, u Myntri u la pyntip ba ha u snem 2021-22 ka MHA, Department of Border Management lyngba ka shithi ba 03tarik u Lber, 2022 ka la pyllait ïa ka song pisa kaba 650 lak tyngka (580 lak na ka bhah jong ka sorkar pdeng bad 65 lak na ka bhah jong ka sorkar jylla) kum ka jingpyllait kaba nyngkong.
U ong ruh ba ka tnad ka la dep ban ïoh pdiang ïa katei ka pisa bad ïa kane la dep ban pyndonkam ha ka jingpyntrei ïa ki 99 tylli ki projek na ki 139 tylli ki projek kiba la mynjur ha u snem 2020-21 bad 100 persen ka UC la dep ban phah sha ka Ministry ha u bnai Nailar mynta u snem.
U pyntip ruh ba ïa ka song pisa kaba dang sah ban pyndep ïa kitei ki projek ba dang sah ba la phah da ka jylla ki kot sha ka 741.83 lak tyngka na ka bhah jong ka sorkar pdeng kaba ka Ministry kam pat pyllait na ka daw ka jingthut ha ka PFMS.
“Nalorkine, 169 tylli ki projek kiba kot sha ka 2229.10 lak katkum ka jingmang jong ka sorkar pdeng na bynta u snem 2021-22 la dep ban mynjur da ka State Level Screening Committee bad ïa kane la dep ban phah sha ka Ministry, hynrei ïa ka pisa haduh mynta ym pat ïoh pdiang,” bynrap biang u Myntri.
La kdew ruh ba ha u snem 2020-21, ka Ministry of Home Affairs ka la mynjur haduh 139 tylli ki projek kam pynroi kaba kot sha ka 15.66 klur tyngka hynrei ym pat pyllait ïa ka song pisa ha kane ka snem mang tyngka.
Halor kane, u Myntri u la pyntip ba ki la dep ban ïa kren bad ka Ministry bad ka daw ba ki ai ka long ba kadei na ka daw jong ka khlam COVID.