Kyrpad ka Sorkar ïa ka UGC ban pyllait ïa ka Jylla na ka CUET mynta u snem

Shillong, Ïaiong 29: Ka Sorkar Jylla kala phah jingthoh sha ka University Grant Commission (UGC) ba kyrpad ban pyllait shuwa ïa ka Jylla Meghalaya na ka jingtreikam jong ka Central University Entrance Test (TEST) mynta u snem 2022.
Ïa kane la pyntip da u Myntri Rangbah ka Jylla Conrad Kongkal Sangma uba la ïathuh ba ka Sorkar Jylla kala buh ruh ïa ka jingkyntu ba ka UGC ka dei ban buh ïa ki CUET Exam Centre ha baroh ki 12 tylli ki District ka Jylla.
Namar ka jingbym pat ai jubab jong ka UGC, u Conrad ula ïakren ruh ïa ka National Testing Agency (NTA) ba kan pynjlan shuwa ïa ka eksam CUET ha Meghalaya, kaba la buh ban long ha u bnai Jylliew.
U Conrad ula kyntu ïa ki samla pule ba kim dei ban ap ïa ka rai jong ka UGC ne NTA hynrei ki dei ban jam sha khmat ha kaban pyndap noh kloi kloi ïa ki phorm kiba donkam jong ka Entrance Test naba ka jingpdiang ïa ki phorm kan kut noh ha ka 6 tarik u Jymmang.
Ha kajuh ka por, u Myntri Rangbah ula ong ba ka jingpyndap ïa ki phorm jong ka CUET ka long kaba kongsan bha naba baroh ki College ki dei kiba iasoh bad ka North Eastern Hill University (NEHU) kaba dei ka Central University. U ong ba ki samla ki dei ban shimkhia bha ïa ka eksam CUET bad ban leit ruh ban ialeh ïa kane ka eksam.
Kumjuh ruh u Myntri ka Tnad Pule Puthi ma Lahkmen Rymbui u pyntip “ Ngi la ïakren bad ka Sorkar Pdeng halor ka jingbymdon ki bor komputer ban pynlong ïa kane ka eksam ha baroh ki District ka Jylla haba kyrpad ruh ban phah pyllait shuwa ïa ka UGC bad NTA mynta u snem hynrei haduh mynta ym shym la ïoh jubab satia”.
“Nga kyrmen ba u Myntri Rangbah ka Jylla un sa leit ïakynduh ïa u Myntri bad ki Heh Ophisar ka Ministry of Education ban batai ïa kane ka jingeh ba iatakhuh da ka Jylla Meghalaya, kaba don tang kawei ka Central University kaba iasoh da baroh ki College” ula ong.
Haba pyntip ba ka jingtheh phorm ban applai ïa ka CUET kala ïaid shakhmat mynta, u Myntri ula pynpaw ïa ka jingkmen ba baroh ki College kila shimkhia ban leh ïa kaba donkam bad kila pynlong ruh ïa ki jingïalang bad ki Principal jong ki skul bapher bapher halor kane ka kam bad ban iarap ruh ïa ki samla pule kumno ban applai ïa ka CUET.
U Myntri ula kubur ba bun na ki samla pule kim pat long kiba la khreh ïa kane ka eksam namar ba ka jingpynbna jong ka UGC kala wan ha ka por ba ki dang long eksam bad ruh ba ka test kan long lyngba ki kot NCERT.
Halor ka jingkylli ïa kaei ka ban jia ïa ki samla pule ki bym pass ïa ka CUET, u ma Lahkmen ula ong “Kan nym don satia ka pass mark hynrei ki donkam ban ialeh ha kaban ïoh heh ka percentage namar lyngba kane, ki College kin sa don la ki jong ki percentage ban pynrung klas”.
Halor ka jingdawa ka KSU ban seng noh ïala ka jong ka University ka Jylla, u Myntri ula ong ba ka Sorkar kala dep ban mynjur ïa ka Aiñ naduh u snem 2011 ba ïadei bad ka Captain Williamson Sangma Technical University hynrei haduh mynta kane ka University kam pat treikam pura.