Shillong, Naiwieng 07: Ka Sorkar jylla ka la kyrpad ïa ka Meghalaya Commercial Truck Owners and Drivers Association (MCTODA) ban wengnoh ïa ka jingïakhih jong ki bad ban wan sha ka meij jingïakren ha kaba ïadei bad ka jingïakhih jong ki bad ban lah ruh ban pynbeit ïa kane ka jingeh jong ki.
Haba ïadei bad kane haba ïakren bad ki lad pathai khubor ha ka sngi Thohdieng u Symbud Myntri Rangbah uba khmih ïa ka tnat Home (Police) u Bah Prestone Tynsong u la ong ba ka sorkar ka la pynlong ïa ka jingïalang ba la pynïaid da u Symbud Myntri Rangbah u Bah Sniawbhalang Dhar bad ka MCTODA ban ïasyllok ïa kane ka kam.
“Na ka liang ka sorkar ngi kyrpad ïa ki ban wengnoh ïa kane ka prokram ïakhih bad kan bha ba kin wan sha ka meij jingïakren na ka bynta ka jingïaid beit ki kam ki jam,” ong u Bah Tynsong.
U la ong ba ka sorkar ka dang ap ïa ka rai jong ka MCTODA ha kaba ïadei bad ka jingwengnoh jong ki ïa kane ka jingïakhih. “Ngi dang ap ïa ka rai jong ki ha kaba ïadei bad kane ka kam,” u la ong.
