Khliehriat Iaiong 10: Ka Khasi Students Union Wapung Unit, myn ha ka 8 tarik mynta u bnai ka la leit ban buh da ka jingthoh ha khmat u Sub-Divisional Officer, 132/33 KV KHLIEHRIAT Grid Sub-Station East Jaiñtia Hills District bad kyrpad na katei ka tnat bor ding ba kan sngewbha ban buh noh kawei ka Sub-Station ha Wapungskur khnang ba ka jingioh bor ding ki paidbah ka thaiñ kan long kaba tikna namar ka jingduh bor ding ka long khah khah bha.
Katkum ka shithi ba la soi da u President KSU Wapung Unit, u samla Deiniwan Lyngdoh bad u General Secretary u samla Shwari Ryngkhlem, la ong bad pynpaw ba ki long iïng ha shnong Wapung bad kumjuh ruh ki shnong ba marjan ki ju iakynduh jingeh bha namar ka jingduh bor ding kaba ju jia khah khah ha ka thaiñ bad ym tang katta, ka bor ding ruh ka long kaba duna bha ha ka voltage ne kam da shai bha kumba long ha kiwei kiwei ki jaka, lehse ka lah ban dei namar ka jingkhia palat ka load, namar tang na u khatwei hajar KV lane (11000KV) u line bor ding la pyn poi bor ding sha kiba bun tylli ki shnong kiba kot shaduh shnong iongkaluh, Pynthorsale, Mukhaïalong,Mutong, Chamcham, Lumshyrmit, Wapungskur, Wapung Shnong, Pamra paithlu, Pamra Kmai, Sohkymphor, iurim Khliehshnong, Byrwai, Mynska, Myntriang bad kiwei kiwei ki shnong.
Kumjuh ruh lyngba u kyrwoh khubor, kitei ki nongialam jong ka KSU Wapung Unit, ki la pynpaw ka jingsngew khia halor ka jingduh bor ding khah khah ha ka thaiñ Wapung bad ha ki shnong ba mar jan bad ong ba kane ka buh jingeh haduh katta katta ïa ki paidbah khamtam ïa ki khynnah skul kiba donkam ïa ka bor ding ban pule kot bad kumjuh ruh kiwei kiwei ki kam kiba donkam ban trei da ka bor ding electrict.
Na ka liang ka seng, ka buh ka jingkyrpad ïa utei u heh jong ka tnat bor ding uba dei u Sub-Divisional Officer, 132/33 KV KHLIEHRIAT Grid Sub-Station East Jaiñtia Hills District ba un sngewbha ban pyrkhat lem ïa kane ka jingkyrpad ka seng kaba long na ka bynta ka jingbit jingbiang ki paidbah kiba pyndonkam bor ding.
