Nongpoh, Naitung, 18: Ka Hynñiewtrep Youth Council, Ri-Bhoi District hapoh ka jingïalam u Samla RC Thangkhiew lem bad ka jingsynran lang jong u samla Tony Shylla President ka Nongpoh Circle mynta ka sngi ki la leit ban ïakynduh ïa u Superintendent of Police ka Ri-Bhoi District, hynrei kim shym la iohlad satia ban kynduh namar ba um don satia ha ophis treikam ha kaba ka seng ka la ioh pat ban buh da ka jingthoh ha ophis u SP ha ka kaba ïadei bad ka jingbym don ki pulit kynthei ha Patarkhmah Police Station.
Haba kren sha ki lad pathai khubor hadien, ka jingleit buh ïa ka dorkhas na ka liang u Samla RC Thangkhiew u la ong ba ka thaiñ Ri-Bhoi Sepngi ka dei ka thaiñ kaba la heh bad iar, bad shibun jait ki kam sniew ki don bad teng teng ka donkam shisha ïa ki pulit kynthei ban don ha katei ka PS khamtam ki kam kiba ïadei bad ki longkmie ne ki kynthei khynnah.
Kum ka seng ka la dawa na u SP ka Ri Bhoi ba ki dei ban phah noh ïa ki pulit kynthei sha Patarkhmah Police Station khnang ba Patarkhmah Police Station kan lah ban treikam lada don kano kano ka case kiba ïadei bad ki kynthei, bad u la ong ruh wat la na ka liang ka seng kam shym la ioh ban kynduh ïa u SP mynta ka sngi hynrei hadien ba la ioh ban buh da ka jingthoh kin sa wan pat ban buddien biang ïa katei ka kam bad wat ban leit kynduh ïa u Home Minister ruh lada donkam, namar ka jingdonkam ïa ki pulit kynthei ban don ha katei ka Police Station.
