Shillong, Jymmang, 13: Ka Hill State Peoples Democratic Party (HSPDP) ha ka sngi Palei ka la pynsngew hakhmat ka jingïalang jong ka Coordination Committee ka kynhun Meghalaya Democratic Alliance (MDA) kaba bat ïa u lakam synshar hapoh ka Jylla ban pyrshah ïa ka jingwanrah ïa ka Meghalaya Regulation of Gaming Act, 2021 khnang ban ithuh noh da ka aiñ ïa ki jingkhalai Online bad ka jingbuh ïa ki Casino hapoh ka jylla Meghalaya.
U President ka HSPDP Bah KP Pangniang ha ka jingïakren bad ki lad pathai khubor ula ong, “da lade hi nga la pynsngew hakhmat ka jingïalang jong ka MDA ha kaba ïadei bad ka Meghalaya Regulation of Gaming Act, 2021 bad ka la don ka jingïatai kaba la slem bha halor kane ka mat.”
“Nga ka liang jong ka Party ngi shu ong shai ba ngim pat ïoh ïa ka dur ka dar jong ka Act. Ngi shu ïohsngew pynban ba kan don ka Casino bad u Myntri Rangbah u la pynshai ba yn ym buh ïa ka Casino ha Nongstoiñ, ha Jowai bad ha Shillong hynrei sha kiwei pat jaka. Tangba ngi la ong shai kdar ba ïa kane ka khalai ym dei ban pyntreikam hapoh ka jylla jong ngi,” u la ong.
“Na ka liang ka Sorkar ka la pynshai ba kam don jingthmu satia ban ïaid shaphrang hynrei tang ban tehlakam ïa kiba la don lypa. Ngi la kren shai ba kan jin da la bha ban ym pat pyntreikam namarba ka ktah ïa ka jingsngew jong ngi bad khamtam eh ïa ki nongïalam Balang, khamtam eh ïa ka imlang ka sahlang kaba ngim lah satia ban ïohi ïa kaba bha lane ïoh lehse kan ktah ïa ka jinglong jingman ha ka imlang ka sahlang bad ka akor ka burom jong ka jylla,” ong shuh shuh u Bah Pangniang.
