Kyrpad ka HANM ïa ka Sorkar ban ujor sha ka ECI ïa kiba bat EPIC ar tylli ha Langpih

Shillong, Jylliew, 15: Ka Hynñiewtrep Achik National Movement (HANM) ha ka sngi Palei ka la aiti da ka jingthoh ha u Myntri ka Sorkar Jylla u Bah Paul Lyngdoh uba long ruh u Chairman jong ka Regional Committee na ka bynta ka West Khasi Hills da kaba kyntu ïa ka Sorkar Jylla ba kan pynsngew sha ki tyndong skhor jong ka Election Commission of India (ECI) ban leh eiei pyrshah ïa ki briew kiba sah ha ka thaiñ Langpih kiba bat ar tylli ki EPIC , kawei na ka jylla Meghalaya bad kawei na ka Jylla Assam.
Ha ka jingïakren bad ki lad pathai khubor, u General Secretary jong ka HANM u Bah Kyllang Thongni u la kynnoh ba ki briew kiba sah ha ki thaiñ khappud khamtam ki bym dei ki Khasi ki dei kiba don ar tyll ki EPIC, kata, jong ka Jylla Meghalaya bad ka Jylla Assam bad dei halor kane ka daw ba kan jwat bha ka jingïapynbeit pud hapdeng ka Jylla Meghalaya bad ka Sorkar Assam khnang ban pynkut noh ïa ka jingïajia pud kaba la neh mynta la san phew snem kynthih ha ka thaiñ Langpih.
“Ngi la kyrpad ïa u Chairman jong ka Regional Committee ba un shimkhia da kaba pynsngew ïa kane ka kam sha ka Election Commission of India (ECI) bad ban thung ruh da ka jingtohkit khnang ban lap ïa ka jingshisha khnang ba ïa ka jingïakajiapud ha ka thaiñ Langpih yn dup lah ban pynkut noh mardor,” la ong u Bah Thongni.