Shillong, Jylliew 17: Ka Forever Young ha ka shithi ba la phah sha u Myntri Rangbah ka jylla ka la kyrpad ban kynthup lang hapoh ka Theatre ne Drama kum shi bynta na ka Meghalaya Film Tourism Policy 2025 (MFTP).
Ha ka shithi ba la phah la ong ba kane ka Club ka kwah ban don bynta ban pynwandur ïa ka Meghalaya Film Policy 2025 khnang ban ailad ïa ki samla kiba don ïa ki sap ki phong khamtam kiba don ka sap ha ka tem ka put bad kumjuh ruh ha ki kam shna phlim ha kaba ka sorkar kan ai ki lad jingïarap ha kaba ïadei bad ki kam pisa piliañ.
“Ka Forever Young bad ka Maitshaphrang ka la ju pynlong ïa ki kam ïalehkai ha ki surok ha kaba ki la kren da ki ktien Khasi bad English. Ngi la leh artylli ki jingïalehkai ha Doordarshan Kendra Shillong bad ka jingkyntiew ha ka pule puthi ha NEHU. Kawei na ki phlim ka dei ka “Papa Shano Phi Don bad Burom ïa u ba Ïap kiba dei ha ka tem ka put ha ka ktien Khasi bad ka musical play kaba dangshen ka dei “Juliet and Romeo” hynrei na ka jingbym ïoh ki lad jingïarap pisa na ka sorkar ngi khlem lah ban rah hapoh ka rynsan kumba la donkam,” ong ka kyrwoh ba la phah da President ka Forever Young u Bah Michael N Syiem.
