Shillong, K’ Lyngkot 03: Ka Central Puja Committee, Meghalaya ha ka shithi ba ka la thoh sha ka Deputy Commissioner ka East Khasi Hills District ka Kong R M Kurbah kaba dei ruh ka Chairperson jong ka Committee ki 10 ngut ki dkhot, ha ka sngi Thohdieng ka la kyrpad ba kan ai jingbit ban plie ïa ka Krem Mawjymbuiñ, kaba ha Mawsynram, EKHD na ka bynta ki riewngeit ha u bnai bakhuid u ban wan ba la tip kum ka “SHRAVANA” kaba dei naduh u bnai Jylliew bad u bnai Naitung, 2025- ban pynbna ïa kane ka krem kaba khuid kum ka jaka jngohkai ka niam khnang ban khring bad pynlong ruh kum ka International Religious Tourist-red.
Ha ka jingthoh ba la phah sha ka, ka Central Puja Committee (CPC), Meghalaya ka ai khublei nyngkong ba la pynlong lem ïa ka kum kawei na ka committee ki 10 ngut ki dkhot ban weng ïa kane ka jingeh.
Ka CPC ka la pyntip ruh ba hadien ba la ïoh kane ka jingshah khot sngewbha sha ka jingïalang, ka CPC, Meghalaya ka la pynbeit ïa ka jingïakynduhlang ki dkhot ha ka lah sngi u Blei ka 29.12.2024. Ïa ka jingïalang la pynïaid da u Naba Bhattacharjee, President, CPC.
Ha ka shithi ka la pyntip ruh ba ha ryngkat ka Core Group Member jong ka CPC, Meghalaya, u J.L. Das, General Secretary, CPC u la shim bynta lang ha ka jingïalang na Bengaluru.
Hadien ka jingïatai bha halor kane ka kam, ka jingïalang ka CPC Virtual Meeting da kawei ka rai la shim ban kyrpad hakhmat ka jingïalang da pynpaw ba kane ka krem la tip kum ka jaka Religious Tourist bad ha u snem 2002 palat 200 ISKCON kiba riewngeit na baroh kawei ka pyrthei ki la wan jngoh ïa ka Shillong bad ki la pynlong Puja ha ka krem hynrei na ka liang ka CPC ka la pynbeit noh kawei ka lynti kaba ïadei bad ka jingdonkam ban pynneh ïa ka jingkhuid hapoh bad sawdong jong ka krem Mawjymbuiñ.
Ha ka shithi ki la pynpaw ruh ba ka don ka jingai jingmut kaba ïadei bad ki jingsngewkhia kiba bun ki sengbhalang bad Rangbah Shnong ka Mawsynram, ka CPC ha ka jingïalang ka la ai jingmut ba dei ban don ki kyndon bad ki rukom pynbeit bad pynïaid kiba khlaiñ. Ban thaw ïa ki kyndon haba ïadei bad ki kam lehniam hapoh ka krem ha baroh shisnem khamtam ha ki 4 sngi jong u bnai “SHRAVANA, kata u bnai Jylliew bad bnai Naitung khnang ban lah ban pynïaid ïa kane ka bynta, ka CPC, Meghalaya ka lah ban buh 30-40 ngut ki Volunteer ban ïarap ïa u Rangbah Shnong bad ïa ka Dorbar Shnong baroh kawei.
Ka la ai jingmut ruh ba ïa ka tulop jong ki 4 ngut ki briew dei ban siew da ka tnat Jngohkai ka sorkar Meghalaya . Na ka bynta ki kam jingtei bad ki kam pynroi hapoh ka krem ka sorkar ka lah ban ai jingïarap pisa kumba T. 5 lak bad baroh dei ban pynbeit da kiwei ki nongpeit ha ki sngi ba bun kiba leit ha ki 4 sngi U Blei jong u bnai, “SHRAVANA”. Ka la ong ba ka CPC, Meghalaya kan ïarap pynbiang na duna eh kumba 30 ngut ki Volunteer ban ïarap ïa u Rangbah Shnong bad ïa ki briew jong ba kin pynbeit ïa ki kyndon ïa ki riewngeit bad kiba wan jngohkai.
Ka la ai jingmut ba ha kine sngi ba ïa mih paidbah, tang kumba 500 ngut ki riewngeit yn dei ban shah ban jngoh bad ïa kane yn pynbeit bad bthah da ka CPC. Lada ïa kane ka jingai jingmut bad jingkyrpad ka CPC la pdiang yn sa thaw noh ïa ka Drafting Committee da kane ka jingïalang, ong ka shithi ba la soi da u Bah Supriyo Dhar, Addl. General Secretary, CPC, Meghalaya, Shillong.
