Shillong, Jylliew, 22: Ka Baghmara Citizens’ Forum (BCF) kaba kynthup ïa ki nongïalam niam, ki nongshong shnong ba la kham rangbah bad baroh ki nongshong shnong jong ka shnong Baghmara, South Garo Hills District
ki la aiti da ka jingthoh ha u Myntri Rangbah ka Jylla u Conrad K. Sangma ban ym phai lyndet ïa ki jingeh ba ki paidbah ki la mad ha ka jingshah lynshop bajur ha ka mariang ha kine ki khyndiat sngi ba la leit noh.
“Naduh ka sngi Thohdieng haba la jia ka jingshlei um bad ka jingtwa khyndew, ngi la hap ban shu shong dum khlem bording bad khlem ïoh pyndonkam wat ïa ka mobile phone (tad haduh hynin ka sngi Baar). Ka daw ka long, ba ngi dei ka District kaba dang sahdien bad kaba don sha kyndong tam ha ka jylla, ha ka jingshisha, ha ka ri,” ong ka BCF.
Ban wanrah ïa kine ki jingeh, ki sengbhalang bapher bapher napoh ka distrik ki la pynsngew na ka por sha ka por haba ka jingdawa ka shah.
Ka Forum ka la kynthoh ruh ba ka jingshah leh meinah jong ka South Garo Hills ka dang ïai bteng haduh kine ki sngi wat hapdeng ki jingud jingnam na ka por sha ka por.
“Ka jingbym don ki jaka sumar kum ka District Hospital ha Baghmara, sa katno shuh ki paidbah kin dang leit wad jingsumar sha Tura. Ka Hospital ban ai jingsumar ïa ki kynthei bad ïa ki khynnah bad kiwei kiwei kim don satia,” ong ka Forum.
“Tang kiba kham bit kham biang ki lah ban leit sha Tura ban ïoh jingsumar lada kam long makna kaba paka. Namarkata, ka District ka donkam ïa ka Hospital bad khamtam ïa ka jingïohi khmat lem jong ka Sorkar Jylla bad ban leh noh mardor ïa kine ki mat ba la kdew khlem da pynslem shuh,” la bynrap ka Forum.
Ka Forum ka la kdew ruh ba ka South Garo Hills ka donkam kyrkieh eh mynta ïa ki nar post pynpur ding elektrik kiba kham jrong khnang ban lait na ka jingshah ban ha ki dieng kiba khyllem bad khnang ba kan ym wanrah ïa ka jinglip bording ha ka thaiñ.
Shuh shuh ka Forum ka la pynsngew ruh ha kaba ïadei bad ka jingshan pynbha ïa ka surok kiba la shah pynjot ha ka jinglynshop ki bor ka mariang bad khamtam ki surok bym pat siang rong.
“Ngi khmihlynti ba u Myntri Rangbah lyngba kane ka shithi kyrpang un ym leh matlah ïa ki jingeh jong ki paidbah nongshong shnong ka Baghmara,” la kyrpad ka Forum.
