Shillong, Nailur 30 : U Chief Secretary ba thymmai jongka jylla u Dr Shakil P Ahammed u pynpaw ka jingkyrmen skhem ba ka lawei jongka jylla kan long kaba phuh ba phieng bad kaba kiew ha ka roi ka par bad kine ki thong ba la pruid dak kin sa urlong shwa u 2032.
Haba shimti kum u CS ba thymmai jongka jylla u la smai ruh ban ïalam ïa ka jylla ban poi sha katei ka thong.
U la ong kine ki thong kiba la pruid dak da u Myntri Rangbah u Conrad K Sangma ki long kum ka thong sha ka roi ka par ba pura jongka jylla.
“ Khlem artatien kum uwei na ki ophisar ba la rim ka jylla ngan pyrshang ban trei sted katba lah la ka bor. Nga ngeit skhem ma nga bad ka kynhun ophisar jong nga ngin ïatrei da ka juh ka thong hapoh ka jingïalam jong u Myntri Rangbah ka jylla bad ki Myntri sorkar bad khlem don jingartatien ngin poi beit sha kata ka thong” ong u Dr Ahammed haba ïakren bad ki nongthoh khubor.
Haba phai sha ka rukom treikam hapoh ka jylla da ki nongtrei sorkar, une u Chief Secretary ba thymmai u kyrmen skhem ba ka jylla Meghalaya ka dei ka jylla kaba sngewtynnad bha ban trei. U la buh thong ban ïatrei lang bad baroh ki nongtrei sorkar ban poi sha ka thong bad jingthmu ba kyrpang jongka sorkar.
U ong baroh ki plan bad ki projek ki dei ban long kiba seisoh.
