Kyrmen u bah Mayral Born ban sdang biang ka jingïakren pynbeit pud hadien ka election ka Assam

Shillong, Iaiong 6 : U Chairman ka Meghalaya State Health Advisory Board (MSHAB) bad MLA ka UDP na Nongpoh Bah Mayral Born Syiem ha ka Lah Sngi U Blei, ula pynpaw ia ka jingkyrmen ba ka jingïakren pynbeit pud hapdeng ka jylla Meghalaya bad Assam kan sa bteng biang hadien ba la kut ka election MLA ha Assam, kaba ka jingthep vote kan long ha ka 9 tarik u Iaiong.
“Hadien ba la dep pynbna ïa ka result bad la thaw ïa ka sorkar kaba thymmai, nga kyrmen skhem ba ka jingïakren kan sa sdang biang ban ïakren sani halor ka jingsahteng ka jingangnud bad ka jingthrang ki paidbah jong ka jylla” ong u Bah Syiem haba ïakren bad ki nongthoh khubor.
Haba kylli halor ka jingmih ka jingïakynad ha khappud, ula batai da kaba ong, “Kane ka dei ka kam ka ban ïai bteng bad baroh ar ki sorkar jylla ha ka liang ka kyrdan jong ki Myntri Rangbah, Regional Committee, bor pynïaid district, pulit bad ki bor khmih ïa ka aiñ ki dang peitngor bad ban pynthikna ïa ka shongsuk, shongsaiñ bad jingïada ïa ki nongshong shnong baroh. Ki jingjia kin jia, ngim lah ban len ïa kata, hynrei ngi hap ban shimkhia mardor ïa ki”.
Haba kylli la ka Meghalaya kan pynbor ïa ka sorkar Assam ban sdang biang ïa ka jingïakren, u Bah Syiem ula pynpaw ïa ka jingskhem jingmut bad ong, “Ngi don ïa ka jingkhmih lynti ba ka sorkar bathymmai ha Assam kan sngap bad ban don ïa ka jingïakren jongki baroh arliang ban pynbeit ïa kane ka mat kham kloi”.