Nongstoiñ, Nailar 30: Ka West Khasi Hills ka dei ka District kaba heh bad ïar bha, hynrei haba phai ha ka ki kam pynroi bad ki jingïarap kiba wan na ka sorkar, na ka bynta ka jingmyntoi jong ki paidbah nongshong shnong, ka duna haduh katta katta la ka long ha ka pule puthi, ka koit ka khiah, ka rep ka riang ka kami kajih, ki lynti ki synkien, ka umbam um dih bad kiwei kiwei khamtam eh ha ki nongkyndong.
Ha ka jingbuddien ïa ki kam pynroi kiba wan na ka sorkar, la lap ba ki dang don bun bah na ki shnong ki thaw ki bym pat don ïa ka um bam umdih kaba biang. Hynrei lyngba ka jingpyntrei kam jong ka sorkar pdeng ïa ka skhim sam umbam umdih kaba thymmai, kaba la tip kum ka Jaal Jivan Mission (JJM), ka la ai jingkynmen ïa baroh ki shnong ba kin sa ïoh ïa ka um bam um dih kaba biang ha kine ki snem ki ban wan.
U bah Brostar Tyrsa na ka shnong Umshynrut haba ïakren bad u nongthoh khubor mynta ka sngi, u la ong ba katei ka shnong ka dei kawei na ki shnong kiba don ha kyndong eh, kaba ha kine ki snem ba la leit noh ki paidbah ki la mad shibun ki jingeh, kum ka jingbym biang jong ka bording, ka jingbym biang jong ka nongtrei ha ka Sub Health Centre, ka um bam umdih.
U la ong ba ha kine ki sngi pat na ka liang ka MECL ka la shimkhia ban pynbiang ïa ka bording bad na ka liang ka tnad ka koit ka khiah ruh ka la shimkhia ha kaba ka nongtrei ha ka Sub Health Centre ka la don beit ha katei ka jaka trei. U bah Tyrsa u la ong ruh ba ha kaba ïadei bad ka umbam um dih haduh mynta, na ka liang ka PHE kam pat sdang ban pyntrei hynrei katkum ka jingtip jong u, ïa katei ka skhim yn sa pyntrei noh shen ha ki bnai tlang ban wan.
